கடன் மதிப்பீட்டை குறைத்த ~எஸ் அண்ட் பி' மீது அமெ.தாக்கு

by **நண்பன்** Tue 9 Aug 2011 - 4:49

கடன் மதிப்பீட்டை குறைத்த ~எஸ் அண்ட் பி' மீது அமெ.தாக்கு
அமெரிக்காவின் உயர்தர கடன் மதிப்பீட்டை குறைத்த ஸ்டாண்டர்ட் அண்ட் பூர் (எஸ் அண்ட் பி) தரச்சான்று நிறுவனத்தை அமெரிக்கா கடுமையாகக் குறை கூறியுள்ளது.

சர்வதேச அளவில் நாடுகளின் கடன் மதிப்பீட்டுக் குறியீட்டை கணக்கிடுவதில் பிரபலமானது எஸ் அண்ட் பி நிறுவனம். இந்த நிறுவனம் சமீபத்தில் அமெரிக்காவின் கடன் திருப்பிச் செலுத்தும் திறன் குறித்த சான்றிதழை வெளியிட்டது.

இதில் அமெரிக்கா இதுவரை பெற்றிருந்த அதி உயர்ந்த கடன் பெறும் அளவை (ஏஏஏ தகுதி) இழந்தது. ‘ஏ ஏ பிளஸ்’ என்ற குறைந்த நிலைக்கு இறங்கியது. அமெரிக்கா பொருளாதார ரீதியாக பின்னடைவைச் சந்தித்து வருவதையும் இந்த தரமதிப்பீட்டுக் குறைவு வெட்ட வெளிச்சமாக்கியது.

உலக அளவில் பெரிய பொருளாதார சக்தியாக கருதப்பட்டு வந்த அமெரிக்காவுக்கு சர்வதேச அளவில் இது பின்னடைவை ஏற்படுத்தியது. ஏனெனில் அமெரிக்க டொலர்கள், அமெரிக்க கடன் பத்திரங்களை வாங்கி வைத்துள்ள நாடுகளுக்கு அவற்றின் மீதான நம்பகத் தன்மையையும் குறையும். அதனால் அவற்றுக்கு வழங்க வேண்டிய வட்டி அதிகரிப்பது, பொருளாதார நெருக்கடிக்குத் தள்ளப்படுவதுமே இதன் தொடர் விளைவாக இருக்கும்.

எஸ் அண்ட் பி நிறுவனம் மதிப்பைக் குறைத்தது தான் இதற்கெல்லாம் காரணம் என்பதால் அந்நிறுவனத்தை அமெரிக்கா கடுமையாகத் தாக்கியுள்ளது.

இது தொடர்பான அறிக்கை அமெரிக்க கருவூலத்துறையின் இணையதளத்தில் வெளியிடப்பட்டுள்ளது. அதில் எஸ் அண்ட் பி நிறுவனத்தின் நம்பகத்தன்மை, நேர்மை ஆகியவை குறித்து கேள்வி எழுப்பப்பட்டுள்ளது. அமெரிக்கா பற்றிய அந்த நிறுவனத்தின் ஆய்வு தவறானது என்றும் கூறப்பட்டுள்ளது. முன்னதாக அந்த நிறுவனத்தின் அறிக்கையில் அமெரிக்காவின் மானியச் செலவு 2 லட்சம் கோடி டொலர் என்று கூறப்பட்டிருந்தது. ஆனால் இது மிக அதிகமான தொகை என்று சுட்டிக் காட்டப்பட்டுள்ளது. இதையடுத்து அது திருத்திக் கொள்ளப்பட்டது.

இதற்கிடையில் அமெரிக்க கடன் பிரச்சினை, ஐரோப்பாவின் யூரோ பயன்படுத்தும் நாடுகளின் கடன் பிரச்சினை குறித்து ஜி 7 நாடுகளின் தலைவர்கள், ஜி 20 நாடுகளின் நிதியமைச்சர்கள் மற்றும் ஐரோப்பிய மத்திய வங்கி ஆளுனர்கள் ஆகியோர் நேற்று முன்தினம் அவசரக் கூட்டம் கூட்டி கலந்தாலோசித்தனர்.

இந்தக் கூட்டத்தில் கடந்த வார இறுதியில், உலகளாவிய பங்குச் சந்தைகளில் 2.5 டிரில்லியன் டொலரை முதலீட்டாளர்கள் இழந்தது; இது போன்ற பிரச்சினைகளை வராமல் தடுப்பது ஆகிய இரு விடயங்கள் முக்கியமாக எடுத்துக் கொள்ளப்பட்டன. ஜி 7 மற்றும் ஜி 20 நாடுகளின் நிதியமைச்சர்களின் அவசரக் கூட்டத்தில், அமெரிக்கப் பிரச்சினை மற்றும் ஐரோப்பிய கடன் பிரச்சினை அலசப்பட்டது.