ஜோதிடம் - 2

பிரான்ஸ் நாட்டைச் சேர்ந்த ஆரூட ராணி லெனார்மனாவின் வாழ்க்கையில் அவர் கணித்துச் சொன்ன சம்பவங்கள் ஏராளம். சுவாரசியமான நூற்றுக்கணக்கான சம்பவங்களில் ஒன்றை, ஜோதிடம் பற்றிச் சந்தேகப்பட்டு வினவுவோருக்குச் சொல்லலாம்.

தங்கள் கைகளை நீட்டி எதிர்காலப் பலன்களைச் சொல்லுமாறு லெனார்மனாவிடம் அனைவரும் கெஞ்சுவது வழக்கம். ஒரு நாள் அப்படிப்பட்ட கூட்டம் ஒன்றில் நின்று கொண்டிருந்த ஒரு இளம் பெண்மணியைப் பார்த்து 'வாழ்க, மஹாராணி!' என்று லெனார்மனா கூவினார். அனைவரும் ஆச்சரியத்துடன் அந்த இளம் பெண்மணியைப் பார்த்தனர். அவரோ சங்கடப்பட்டார். சாதாரணப் பெண்மணியான தான் எந்த தேசத்துக்கு மஹாராணி? கூட்டம் கலைந்த பிறகு அவர் லெனார்மனாவை அணுகினார். "என்னிடம் விசேஷமாக எதையாவது காண்கிறீர்களா?" என்று லெனார்மனாவை அவர் கேட்டார்.

இளம் தளகர்த்தர் ஒருவரின் மனைவியான அந்த அழகியின் பெயர் ஜோஸபைன்! "நீ பிரான்ஸ் நாட்டின் மஹாராணியாக ஆகப் போகிறாய்! அதற்கு முன்னால் உனது தற்போதைய கணவன் இறந்து போவான். நீ பதினெட்டு மாதங்கள் சிறையில் இருக்கப் போகிறாய்! மரண தண்டனை விதிக்கப்பட்ட நீ, சாவின் விளிம்பிலிருந்து தப்பி விடுவாய். ஒரு மாபெரும் போர்வீரனை மறுமணம் செய்து கொள்வாய். அவன் தேன்கூடு வடிவில் இருக்கும் கிரீடத்தை அணிந்து முடி சூடுவான்! அவன் பிரான்ஸை ஆளப்போகிறான். அவனை நீ ஆளப்போகிறாய்!" தீர்க்கமாக மூச்சு விடாமல் பேசி நிறுத்திய லெனார்மனாவைத் திகைப்புடன் பார்த்தார் ஜோஸபைன். அவருக்கு ஒரே சமயத்தில் துக்கமாகவும் சந்தோஷமாகவும் திகைப்பாகவும் மலைப்பாகவும் இருந்தது. இப்படியெல்லாம் நடக்க முடியுமா என்று அவர் எண்ணினார்.

கைரேகை, ஜோதிடம், எண் கணிதம், வானவியல் என அனைத்தும் அறிந்த அந்த வயதான பெண்மணி லெனார்மனா சொன்னபடியே அனைத்தும் நடந்தது!

நெப்போலியன் 1793ம் ஆண்டு லெனார்மனாவைச் சந்தித்தான். அவனுக்கு பிரெஞ்சு ராணுவத்தில் சாதாரண போர்வீரனாக இருக்கப் பிடிக்கவில்லை. துருக்கி செல்ல அவனுக்கு விருப்பம். லெனார்மனாவை அணுகி தனக்கு பிரான்ஸில் எதிர்காலம் இருக்கிறதா என்று கேட்டதோடு துருக்கி செல்ல விண்ணப்பித்தால் பாஸ்போர்ட் கிடைக்குமா என்றும் கேட்டான். லெனார்மனா அவனை நோக்கி, "பிரான்ஸை விட்டுப் போக வேண்டும் என்று நீ ஏன் நினைக்கிறாய்? அவசரப்படாதே! பிரான்ஸின் தலைவிதியையே நதான் நிர்ணயிக்கப் போகிறாய்! பிரான்ஸை ஆளும் மாபெரும் சக்கரவர்த்தியாக நீ முடி சூட்டிக் கொள்ளப்போகிறாய். உன் வாழ்வில் அழகிய இளம் விதவை ஒருத்தி முக்கியப் பங்கு வகிக்கப் போகிறாள். அவளுக்கு மட்டும் துரோகம் இழைக்காதே. இழைத்தால் நீங்கள் இருவரும் அழிவது நிச்சயம்!"

ஆச்சரியப்படும் விதத்தில் அனைத்தும் லெனார்மனா சொன்னபடியே நடந்தது. நெப்போலியன் பிரான்ஸின் சக்கரவர்த்தியாக முடி சூடினான். அழகிய இளம் விதவையான ஜோஸபைனைச் சந்தித்து அவள் அழகில் மனதைப் பறி கொடுத்தான். அவள் கூறியபடியெல்லாம் ஆடினான்!

ஆனால் பின்னால் லெனார்மனாவை ஜோஸபைன் அடிக்கடி சந்திப்பது நெப்போலியனுக்குப் பிடிக்கவில்லை. அதைத் தடுக்க முயன்றான். சந்திக்கக் கூடாது என்று ஆணையும் இட்டான். ஜோஸபைன் அதைக் கேட்கவே இல்லை. இருவருக்கும் உறவில் விரிசல் கண்டது.

ஒரு நாள் அவள் பல பாம்புகள் அவள் மீது சீறிப் பாய்ந்து தாக்குவது போலக் கனவு கண்டாள். பயந்து போன அவள் லெனார்மனாவை அதன் அர்த்தம் என்ன என்று கேட்டாள். இன்னும் ஒரு மாதத்தில் விவாகரத்து ஏற்படும் என்று பதில் கூறினார் லெனார்மனா! அப்படியே நடந்தது! நெப்போலியனின் சாம்ராஜ்ய வாழ்வும் அஸ்தமித்தது; ஜோஸபைனும் புகழ் இன்றி மறைந்து போனார்!

நன்றி நாகராஜன் & நிலாச்சாரல்