முத்தரப்பு கிரிக்கெட்: 39 ரன்கள் வித்தியாசத்தில் வெஸ்ட் இண்டீசை வீழ்த்தியது இலங்கை

by *சம்ஸ் Tue 9 Jul 2013 - 7:53

ட்ரினிடாட், ஜூலை 9-

இந்தியா, இலங்கை, மேற்கு இந்தியத் தீவுகள் பங்கேற்கும் முத்தரப்பு ஒரு நாள் கிரிக்கெட் போட்டி மேற்கு இந்தியத் தீவுகளில் நடைபெற்று வருகிறது. கடந்த ஞாயிறன்று இலங்கை-மேற்கு இந்தியத் தீவுகளுக்கு இடையேயான போட்டி ட்ரினிடாட்டில் நடைபெற்றது.

முதலில் ஆட்டத்தை துவங்கிய இலங்கை அணியின் மகேலா ஜெயவர்த்தனாவும், உபல் தரங்காவும் தலா 7 ரன்களுக்கு ஆட்டத்தை இழந்து வெளியேறினார். பின்னர் இலங்கை அணியினர் 19 வது ஓவரில் 3 விக்கெட் இழப்பிற்கு 60 ரன்கள் எடுத்திருந்திருந்த நிலையில் மழை கொட்ட துவங்கியது. இதனை அடுத்து ஆட்டம் ஒத்திவைக்கப்பட்டு நேற்று நடைபெற்றது.

இதில் சங்கக்கரா மிகச்சிறப்பாக விளையாடி 90 ரன்கள் சேர்த்து இறுதிவரை ஆட்டமிழக்காமல் இருந்தார். மழையின் காரணமாக தொடர்ந்து இரண்டு நாட்கள் நீடித்த இந்த ஆட்டம் 41 ஓவராக குறைக்கப்பட்டது. இறுதியில் 8 விக்கெட் இழப்பிற்கு இலங்கை 219 ரன்கள் எடுத்து இருந்தது.

இதையடுத்து 220 ரன்கள் எடுத்தால் வெற்றி என்ற நிலையில் களமிறங்கிய வெஸ்ட் இண்டீஸ் அணியின் கிறிஸ் கெய்ல் மற்றும் சார்லஸ் இருவரும் தலா 14 ரன்கள் எடுத்த நிலையில் ஆட்டமிழந்து வெளியேறினர். பிராவோ 70 ரன்களும், சிம்மன்ஸ் 67 ரன்களும் எடுத்து சிறப்பாக விளையாடினர். பின்னர் விளையாடிய வீரர்கள் சொற்ப ரன்களில் ஆட்டமிழந்தனர்.

நிர்ணயிக்கப்பட்ட 41 ஓவரில் 9 விக்கெட்டுகளை இழந்து 190 ரன்கள் மட்டும் எடுத்து வெஸ்ட் இண்டீஸ் தோல்வியுற்றது. இதனையடுத்து டி.எல். முறைப்படி 39 ரன்கள் வித்தியாசத்தில் வெஸ்ட் இண்டீஸ் அணியை வீழ்த்தி இலங்கை வெற்றிபெற்றது.

மிகச்சிறப்பாக விளையாடி 90 ரன்கள் எடுத்து ஆட்டமிழக்காமல் இருந்த சங்கக்கரா ஆட்ட நாயகனாக அறிவிக்கப்பட்டார்.

இன்று நடைபெறும் போட்டியில் இலங்கை இந்தியாவை சந்திக்கிறது.