சீனாவில் கடும் நிலநடுக்கம்: வீடுகள் இடிந்ததில் 20 பேர் பலி

by *சம்ஸ் Mon 22 Jul 2013 - 10:04

பெய்ஜிங், ஜூலை. 22–

சீனாவில் இன்று காலை 7.45 மணியளவில் சக்தி வாய்ந்த கடும் நிலநடுக்கம் ஏற்பட்டது. கான்சு மாகாணத்தின் வடமேற்கில் மின்ஷியான் மற்றும் ஷான் ஷியான் பகுதிகள் இணையும் பகுதிகளில் இந்த நிலநடுக்கம் உணரப்பட்டது. இதனால் இப்பகுதியில் உள்ள வீடுகள் மற்றும் கட்டிடங்கள் குலுங்கின. மிகப் பெரிய மரங்களும் ஆடின. எனவே, அச்சம் அடைந்த மக்கள் வீடுகளை விட்டு வெளியேறி தெருக்களில் தஞ்சம் புகுந்தனர்.

இந்த நிலநடுக்கம் காரணமாக ஏராளமான வீடுகள் மற்றும் கட்டிடங்கள் இடிந்து தரைமட்டமாயின். இடிபாடுகளில் சிக்கி 20 பேர் உயிரிழந்தனர். சுமார் 300 பேர் படுகாயம் அடைந்தனர்.

தகவலறிந்ததும் சீன அரசு மீட்பு நடவடிக்கையில் ஈடுபட்டுள்ளது. பாதிக்கப்பட்ட இடங்களுக்கு மீட்பு படையினர் சென்றுள்ளனர். இடிபாடுகளில் சிக்கி தவிப்பவர்கள் மீட்கப்பட்டு வருகின்றனர்.

இதற்கிடையே, 6.6 ரிக்டரில் நிலநடுக்கம் பதிவானதாக அமெரிக்க புவியியல் ஆய்வு மையம் அறிவித்துள்ளது. கான்சு மாகாணத்தில் பெய போவின் மேற்கே 151 கி.மீட்டர் தூரத்தில் 9.8 கி.மீட்டர் ஆழத்தில் நிலநடுக்கம் உருவாகியுள்ளதாக தெரிவிக்கப்பட்டுள்ளது.

மின்ஷியான் பகுதியில் பல நகரங்களில் நிலநடுக்கம் உணரப்பட்டது. அங்கு கட்டிடங்கள் மற்றும் வீடுகள் குலுங்கின. இங்கு ஒரு நிமிட நேரம் பூமி குலுங்கியதால் மரங்களும் ஆட்டம் கண்டன.

அதே நேரத்தில் டிங்ஸி, லாங்னான், தியான் மற்றும் கான்சு மாகாணத்தின் தலைநகர் லாங்ஷீ உள்ளிட்ட நகரங்களிலும் நிலநடுக்கம் உணரப்பட்டது. ஷான்ஸி மாகாணம் அருகேயுள்ள ஸியான், பயோஷி மற்றும் ஸியான்யாங் நகரங்களும் அதிர்ந்தன.

ஸியான் நகரில் தங்கியிருக்கும் லீ என்பவர் கூறும் போது, நான் 31–வது மாடியில் தங்கியிருக்கிறேன். தூங்கி கொண்டிருந்த போது நிலநடுக்கம் காரணமாக எனது வீடு குலுங்கியதை உணர்ந்து அலறியடித்து எழுந்தேன் என்றார்.