நடுவர் தீர்ப்புக்கு மறுபரிசீலனை முறையை இந்தியா மறுப்பது ஏன்

by **நண்பன்** Fri 17 Jun 2011 - 11:50

நடுவர் தீர்ப்புக்கு மறுபரிசீலனை முறையை இந்தியா மறுப்பது ஏன்
பந்துவீச்சாளர் கிறிஸ் ரம்லட்
நடுவர் தீர்ப்புக்கு மறுபரிசீலனை செய்யும் முறையை (யு. ஆர். டி. எஸ்.) இந்திய கிரிக்கெட் சபை (பி. சி. சி. ஐ.) ஏன் மறுக்கிறது என இங்கிலாந்து வேகப்பந்து வீச்சாளர் கிறிஸ் டிரம்லட் கேள்வி எழுப்பி உள்ளார். சர்வதேச கிரிக்கெட் கவுன்சில் (ஐ. சி. சி.) கடந்த 2009ல் நியூசிலாந்து - பாகிஸ்தான் அணிகளுக்கு இடையிலான டெஸ்ட் போட்டியின் போது நடுவர் தீரப்புக்கு மறுபரிசீலனை செய்யும் முறையை (யு. ஆர். டி. எஸ்.) முதன் முதலில் அறிமுகப்படுத்தியது. அதன்பின் கடந்த ஜனவரி மாதம் இங்கிலாந்து அவுஸ்திரேலியா அணிகளுக்கு இடையிலான ஒருநாள் போட்டியில் இம்முறை முதன் முதலில் அறிமுகம் செய்யப்பட்டது. சமீபத்தில் நடந்த உலக கோப்பை தொடரிலும் இம்முறை பின்பற்றப்பட்டது. ஆனால் யு. ஆர். டி. எஸ். முறையை டெஸ்ட் போட்டிகளில் பயன்படுத்த பி. சி. சி. ஐ. மறுத்து வருகிறது. இதனால் அடுத்து வரவுள்ள மே. தீவு, இங்கிலாந்து அணிகளுக்கு எதிரான டெஸ்ட் தொடருக்கு இம்முறை பயன்படுத்த போவதில்லை என பி. சி. சி. ஐ. திட்டவட்டமாக தெரிவித்தது. இது குறித்து இங்கிலாந்து வேகப்பந்து வீச்சாளர் கிறிஸ் டிரம்லட் கூறியதாவது யு. ஆர். டி. எஸ். முறைக்கு நானும் ஒரு ரசிகன் என்று சொல்லிக்கொள்வதில் பெருமை அடைகிறேன். இதுபோன்ற சிறந்த தொழில் நுட்பங்கள் கிரிக்கெட் இருக்கும்போது அதனை நிச்சயம் பயன்படுத்த வேண்டும். யு. ஆர். டி. எஸ். முறை மூலம் துடுப்பாட்ட வீர்கள் மற்றும் பவுலர்கள் இருவரும் பயனடைகின்றனர். இதன் மூலம் இக்கட்டான நேரத்தில் மிகச் சரியான முடிவை அறிந்துகொள்ள முடியும். கடந்த ஆறு மாதங்களாக இந்த முறை சிறப்பாக பயன்படுத்தப்பட்டு வருகிறது.

ஆனால் இந்த முறையை பி. சி. சி. ஐ. பயன்படுத்த மறுப்பது வியப்பாக உள்ளது. இதற்கான காரணம் ஏன் எனப் புரியவில்லை. அடுத்து வரவுள்ள இந்தியா - இங்கிலாந்து அணிகளுக்கு இடையிலான டெஸட் தொடரில், யு. ஆர். டி. எஸ். முறை பயன்படுத்தப்படாதது ஏமாற்றம் அளிக்கிறது. இந்தியாவுக்கு எதிரான டெஸ்ட் தொடரை மிகுந்த ஆவலுடன் எதிர்நோக்கி உள்ளேன். இதில் சிறப்பான ஆட்டத்தை வெளிப்படுத்தும் பட்சத்தில் உலகின் முதுனிலை அணியை வீழ்த்தலாம் இதன் மூலம் டெஸ்ட் அரங்கில் விரைவில் முதல் இடத்தை அடையலாம் என்றார்