எல்லா வகை நிகழ்ச்சிகளிலும் ஜெர்பரா மலர்கள்

ஓசூர் தாலுகாவில் உற்பத்தியாகும், எட்டு வகை ஜெர்பரா அலங்கார பூக்கள், பொக்கைகள்,
திருமணம் மற்றும் பொது விழாக்களில் அலங்கார மேடைகள், வளைவுகள் அமைப்பதற்காக வெளிநாடுகள், வெளிமாநிலங்களுக்கு ஏற்றுமதியாகிறது.

கிருஷ்ணகிரி மாவட்டத்தில், ஓசூர் ரோஜா மலர்களுக்கு உள்நாடு மற்றும் வெளிநாடுகளிலும் நல்ல வரவேற்பு உள்ளது. அதுபோல், இப்பகுதியில் உற்பத்தியாகும் ஜெர்பரா அலங்கார மலர்களுக்கும் உள்நாடு மட்டுமின்றி வெளிநாடுகளில் வசிக்கும் மக்கள் மத்தியிலும் மவுசு அதிகரித்துள்ளது.

ஓசூர், தேன்கனிக்கோட்டை, பேளகொண்டப்பள்ளி, பேரிகை, தொரப்பள்ளி, ஜிமங்கலம், கசுவகட்டா உள்ளிட்ட பகுதியில் உள்ள, 50க்கும் மேற்பட்ட மலர் பண்ணைகளில் அமைக்கப்பட்டுள்ள பசுமை குடில்கள் மூலம் ஜெர்பரா மலர்கள் சாகுபடி செய்யப்படுகின்றன. பொதுவாக ஜெர்பரா மலர்கள் சிவப்பு, ஆரஞ்சு, வெள்ளை, மஞ்சள் உள்பட எட்டு வகை வண்ணங்களில் உற்பத்தியாகிறது. இந்த மலர்களை முழுக்க, முழுக்க பசுமை குடோன்களில் மட்டுமே உற்பத்தி செய்யப்படுகிறது. திறந்தவெளி விவசாய நிலங்களில் ஜெர்பரா அலங்கார பூக்களை உற்பத்தி செய்ய முடியாது. பொக்கைகள், திருமண வரவேற்பு மற்றும் பொது நிகழ்ச்சிகளில் அலங்கார மேடைகள், அலங்கார வளைவுகள் அமைப்பதற்கு ஜெர்பரா மலர்கள் அதிகளவில் பயன்படுகிறது.

ஜெர்பரா மலர்கள் குளிர்ந்த காலநிலை கொண்ட பகுதிகளில் மட்டுமே உற்பத்தியாவதாலும், எல்லா வகை நிகழ்ச்சிகளிலும் அலங்காரங்களுக்கு பயன்படுத்தப்படுவதாலும், ஜெர்பரா மலர்களுக்கு மலர் சந்தைகளில் ஆண்டு முழுவம் நல்ல விலை கிடைக்கிறது. சாதாரண நாட்களில் ஜெர்பரா மலர், ஒன்று, 2 ரூபாய் முதல், மூன்று ரூபாய் வரையும், சீசன் நேரத்தில், 10 ரூபாய் வரையும் விற்பனையாகிறது.

ஓசூர் வேளாண் உதவி இயக்குனர் காளியப்பன் கூறியதாவது: இந்த மலர் செடிகளை ஒரு முறை நட்டால் தொடர்ந்து இரண்டரை ஆண்டு முதல் மூன்று ஆண்டுகள் வரை மலர்கள் பறிக்கலாம் என்பதால் கூடுதல் லாபம் கிடைக்கிறது. தற்போது ஓசூர் பகுதியில், 20 ஏக்கரில் மட்டுமே ஜெர்பரா மலர்களை விவசாயிகள் சாகுபடி செய்துள்ளனர். சாகுபடியை அதிகரிக்க தோட்டக்கலைத்துறை நடவடிக்கை எடுத்துள்ளது. இவ்வாறு அவர் தெரிவித்தார்.

அறிந்திடாத தகவல் நன்றி சாதிக்