பஹ்ரேய்ன் - இலங்கை இரு தரப்பு முதலீடுகளை ஊக்குவிக்க ஏற்பாடு

by **நண்பன்** Sat 25 Jun 2011 - 13:59

பஹ்ரேய்ன் நிதியமைச்சருடன் ஜனாதிபதி விரிவாக ஆராய்வு
பஹ்ரேய்ன் நாட்டுக்கும் இலங்கைக்கும் இடையிலான முதலீடுகளை அதிகரித்து இலங்கையின் பொருளாதாரத்தை மேம்படுத்துவதற்கான முயற்சிகளை ஜனாதிபதி மஹிந்த ராஜபக்ஷ அவர்கள் இப்போது தீவிரமாக மேற்கொண்டு வருகிறார். இதன் ஒரு கட்டமாக ஜனாதிபதி அவர்கள் பஹ்ரேய்ன் இராஜ்யத்தின் ஷேக் அஹமட் பின் முகமட் கலீபாவை நேற்று அலரிமாளிகையில் சந்தித்து பொருளாதார அபிவிருத்தி தொடர்பான பல்வேறு அம்சங்கள் குறித்து விரிவான அடிப்படையில் பேச்சுவார்த்தைகளை நடத்தினார்.

இந்த பேச்சுவார்த்தைகளின் விளைவாக விரைவில் இரு நாடுகளுக்குமிடையில் முதலீட்டு ஊக்குவிப்பு செயற்பாடுகள் ஆரம்பமாகுமென்று அறிவிக்கப்படுகிறது. பஹ்ரேய்னிலிருந்து இலங்கைக்கு விரைவில் வர்த்தகர்கள் குழுவொன்று வருகைதந்து இங்குள்ள முதலீட்டு வாய்ப்புக்கள் குறித்து இலங்கை அதிகாரிகளுடன் பேச்சுவார்த்தைகளை நடத்துவதென்று இக்கூட்டத்தில் தீர்மானிக்கப்பட்டது.

அதன் அடிப்படையில் இலங்கையின் வர்த்தகப் பிரமுகர்களும் விரைவில் பஹ்ரேய்ன் இராஜ்யத்துக் குச் சென்று அங்கு முதலீடு செய்வது பற்றி ஆராய்வார்கள்.

ஜனாதிபதி அவர்களுக்கும், பஹ்ரேய்ன் நிதியமைச்சருக்கும் இடையிலான இந்த சந்திப்பு நாட்டின் பொருளாதார வளர்ச்சிக்கு ஓர் உந்துசக்தியாக அமையும் என்று எமது நாட்டின் நிதித்துறையின் சிரேஷ்ட அதிகாரிகள் நம்பிக்கை தெரிவித்துள்ளார்கள்.

இரு நாடுகளுக்கும் இடையில் செய்து கொள்ளப்பட்ட இரட்டை வரி விதிப்பு தவிர்ப்பு ஒப்பந்தம் தொடர்பாக இதன்போது கலந்துரையாடப்பட்டுள்ளது. பொருட்கள் மற்றும் சேவைகளுக்கு இரட்டை வரி விதிப்பினை தடுப்பதன் மூலம் இரு நாடுகளுக்குமிடையில் வர்த்தகர்களும் பஹ்ரேய்னில் பணியாற்றும் சுமார் 1500 இலங்கையர்களும் நன்மை அடைவரென இதன்போது தெரிவிக்கப்பட்டது.

இச்சந்தர்ப்பதில் அலரி மாளிகையை பார்வையிடுவதற்காக வருகை தந்திருந்த பாடசாலை மாணவர்களுக்கு ஜனாதிபதி மஹிந்த ராஜபக்ஷ அவர்கள் பஹ்ரேய்ன் நிதியமைச்சரை அறிமுகம் செய்துவைத்தமை முக்கிய அம்சமாகும். பஹ்ரேய்ன் நிதியமைச்சர் அந்த மாணவர்களுடன் நீண்ட நேரம் கருத்துப் பரிமாறிக் கொண்டார்.

இந்நிகழ்வில் வெளியுறவு அமைச்சர் ஜீ. எல். பீரிஸ், ஜனாதிபதியின் செயலாளர் லலித் வீரதுங்க, மேலதிக செயலாளர் காமினி செனரத், குவைத் நாட்டிற்கான இலங்கைத் தூதுவர் சீ. ஏ. எச். விஜேரத்ன உள்ளிட்ட மேலும் சிலர் கலந்து கொண்டனர்.