ஏழு வயது சிறுவனை சங்கிலியால் கட்டி வைத்திருந்த பெண் புத்தளத்தில் கைது.

by **ஜிப்ரியா** Fri 29 Jul 2011 - 10:51

ஏழு வயதுச் சிறுவன் ஒருவனை சங்கிலியால் கட்டி பூட்டுப்போட்டு வைத்திருந்ததாகக் குற்றஞ்சாட்டப்படும் பெண் ஒருவரை புத்தளம் பொலிஸார் கைது செய்துள்ளனர்.
பாலாவி கரம்பை பிரதேசத்தைச் சேர்ந்த 42 வயதுடைய பெண் ஒருவரே இவ்வாறு கைது செய்யப்பட்டுள்ளவராவார்.
பாடசாலை செல்லும் வயதுடைய சிறுவன் ஒருவனை சங்கிலியால் கட்டிப் போட்டுள்ளதாக பொலிஸ் அவசர சேவைப் பிரிவினருக்கு கிடைத்த தகவல் புத்தளம் பொலிஸாருக்கு உடனடியாக வழங்கபட்டதையடுத்து உடன் செயற்பட்ட புத்தளம் பொலிஸார் குறித்த இடத்திற்கு சென்று சிறுவனை மீட்டுள்ளதுடன், குறித்த பெண்ணையும் கைது செய்துள்ளனர்.
குறித்த சிறுவன் தனது சகோதரியின் மகன் எனவும், அச்சிறுவன் பாடசாலை செல்வதாகக் கூறிவிட்டு வீட்டிலிருந்து தனது வீட்டுக்கு வந்து மறைந்திருப்பதாகவும், இதனால் அச்சிறுவனைப் பயமுறுத்தவே தான் இவ்வாறு செய்ததாகவும் கைது செய்யப்பட்ட சந்தேகநபரான பெண் பொலிஸாரிடம் தெரிவித்துள்ளார்.
கைது செய்யப்பட்ட சந்தேகநபரான பெண்ணும், சிறுவனும் புத்தளம் நீதிமன்றத்தில் ஆஜர்படுத்த புத்தளம் பொலிஸார் நடவடிக்கை மேற்கொண்டுள்ளதுடன், மேலதிக விசாரணைகளையும் மேற்கொண்டு வருகின்றனர்.