கர்நாடக முதல்வர் எடியூரப்பா ராஜினாமா

கர்நாடக முதல்வர் எடியூரப்பா ராஜினாமா
புதிய முதல்வராக தான் சொல்லும் நபரையே தேர்வு செய்ய வேண்டும் என்ற நிபந்தனையை பா.ஜ. மேலிடம் ஏற்றுக்கொண்டதால் எடியூரப்பா தன் முதல்வர் பதவியை ராஜினாமா செய்தார். கர்நாடக பா.ஜ.வில் பிரச்சினை உருவான போது நீண்ட இழுபறிக்குப் பின்னர் எடியூரப்பா ராஜினாமா கடிதம் அனுப்பியதாக தகவல்கள் வெளியாயின.

இதனால் பிரச்சினை சுமுகமாக முடியும் என்று எதிர்பார்க்கப்பட்டது. புதிய முதல்வரைத் தேர்வு செய்ய பா.ஜ. மேலிடத் தலைவர்கள் பெங்களூரு வந்தனர். அதற்குள் பா.ஜ., எம்.எல்.ஏ.க்களின் “தொனி” மாறியது. எடியூரப்பாவை மாற்றக்கூடாது என்று 75 எம்.எல்.ஏ.க்கள் போர்க்கொடி உயர்த்தினர்.

மேலிடத் தலைவர்கள் எடியூரப்பாவுடன் நடத்திய பேச்சு தோல்வியடைந்தது. ராஜினாமா செய்வதற்கு எடியூரப்பா, பல நிபந்தனைகளை விதித்தார். இதைத் தொடர்ந்து நேற்று மூன்றாவது நாளாக கர்நாடக பா.ஜ.வில் அனல் பறந்தது. “தான் சொல்பவையே நடக்க வேண்டும்” என்ற பிடிவாதத்தில் எடியூரப்பா சனிக்கிழமை காலையிலிருந்தே, தன் ஆதரவு அமைச்சர்கள் எம்.எல்.ஏ.க்களுடன் பல சுற்று பேச்சு நடத்தினார்.

மற்றொரு புறம், மாநில பா.ஜ. தலைவர் ஈஸ்வரப்பா, அனந்தகுமார் எம்.பி. அமைச்சர்கள் ஜெகதீஸ் ஷெட்டர், அசோக் ஆகியோர் ஒன்று கூடி எடியூரப்பா பிடிவாதத்தின் பின்னணியில் உள்ள அடுத்த நடவடிக்கை குறித்து ஆலோசித்தனர்.

இதக்கிடையில் பா.ஜ. மேலிடத் தலைவர்கள் ராஜ்நாத் சிங், அருண் ஜெட்லியை, முதல்வர் எடியூரப்பாவும், மாற்று கோஷ்டியைச் சேர்ந்த ஈஸ்வரப்பா, அனந்த குமார், ஷெட்டர் அணியினரும் தனித்தனியாகச் சந்தித்துப் பேசினர்.

இரண்டு மணிநேர ஆலோசனைக்குப் பிறகு “கட்சி மேலிடக் கட்டளைக்கு எதிராக செயல்படமாட்டேன்” என்று எடியூரப்பா, மேலிடத் தலைவர்களிடம் உறுதியளித்ததாகத் தெரிகிறது. இதேவேளையில் பா.ஜ. எம்.எல்.ஏ.க்கள் கூட்டத்தில் கலந்து கொள்ள வேண்டும் என்று கட்சி மேலிடம் அழைப்பு விடுத்தது. இதற்கான தகவல் எஸ்.எம்.எஸ். மூலம் அனுப்பப்பட்டது.

இந்த நேரத்தில் அமைச்சர் பசவராஜ் பொம்மை, முதல்வர் எடியூரப்பா எழுதிய அறிக்கை ஒன்றை வாசித்தார். அப்போது அவர் கூறியதாவது, “எடியூரப்பா தன்பதவியை ராஜினாமா செய்யமாட்டார். மேலிடத்துக்கப் பல நிபந்தனைகளை விதித்துள்ளார். என மீடியாக்களில் செய்திகள் வருகின்றன. அவை எல்லாம் பொய்யானவை.

அவற்றை எடியூரப்பா முழுமையாக மறுக்கிறார். கடந்த வியாழக்கிழமையன்று, பா.ஜ. பார்லிமென்ட் குழு மற்றும் பா.ஜ. மேலிடத் தலைவர்கள் எல்லாம், எடியூரப்பா ராஜினாமா செய்ய வேண்டும் என முடிவெடுத்தனர். அதன்படி அவர் தன் பதவியை ராஜினாமா செய்வார். இவ்வாறு பசவராஜ் கூறினார்.