காமன்வெல்த் போட்டி ஊழல் புகார்: ஷீலா தீட்சித் பதவி விலக தேவையில்லை; காங்கிரஸ் அறிவிப்பு

புதுடெல்லி, ஆக.6-

டெல்லியில், கடந்த ஆண்டு அக்டோபர் மாதம் காமன்வெல்த் போட்டிகள் நடைபெற்றன. அதில் நடைபெற்ற முறைகேடுகள் தொடர்பான குற்றச்சாட்டால், அப்போட்டியின் ஒருங்கிணைப்பு குழு தலைவராக இருந்த சுரேஷ் கல்மாடி உள்ளிட்டோர் கைது செய்யப்பட்டு உள்ளனர்.

இந்நிலையில், காமன்வெல்த் போட்டி முறைகேடுகள் பற்றி விசாரித்த மத்திய தலைமை கணக்கு தணிக்கை அதிகாரியின் அறிக்கை பாராளுமன்றத்தில் நேற்று தாக்கல் செய்யப்பட்டது. அதில், டெல்லி மாநில காங்கிரஸ் முதல்- மந்திரி ஷீலா தீட்சித் பற்றி குற்றம் சாட்டப்பட்டுள்ளது.

இதையடுத்து, ஷீலா தீட்சித் பதவி விலக வேண்டும் என்று பா.ஜனதா கோரிக்கை விடுத்துள்ளது. இதுதொடர்பாக அக்கட்சியின் செய்தித்தொடர்பாளர் ரவிசங்கர் பிரசாத் கூறியதாவது:-

தணிக்கை அறிக்கையில் குற்றம் சாட்டப்பட்டுள்ள ஷீலா தீட்சித் பதவி விலக வேண்டும். அவர் விலக மறுத்தால், அவரை பதவி நீக்கம் செய்ய வேண்டும். காமன்வெல்த் போட்டி ஊழல் தொடர்பாக, சுரேஷ் கல்மாடி மற்றும் அவருடைய கூட்டாளிகள் மீது சி.பி.ஐ. விசாரணை நடத்தி வருகிறது. இனிமேல், ஷீலா தீட்சித் மற்றும் அவருக்கு நெருக்கமானவர்களின் பங்கு பற்றியும் சி.பி.ஐ. விசாரிக்க வேண்டும்.

காமன்வெல்த் போட்டி ஒருங்கிணைப்பு குழு தலைவராக சுரேஷ் கல்மாடி நியமிக்கப்பட்டதே தவறானது. அவர் நியமிக்கப்பட்டது எப்படி என்று பிரதமர் விளக்கம் அளிக்க வேண்டும். காமன்வெல்த் போட்டி ஊழலில், பிரதமர் அலுவலகம், நிதி அமைச்சகம், மந்திரிகள் குழு ஆகியவற்றுக்கும் தொடர்பு உள்ளது. இவ்வாறு அவர் கூறினார். ஆனால், பா.ஜனதாவின் கோரிக்கையை காங்கிரஸ் கட்சி நிராகரித்துள்ளது. இதுதொடர்பாக மத்திய சட்ட மந்திரி சல்மான் குர்ஷித் கூறியதாவது:-

எடியூரப்பா மீதான லோக் ஆயுக்தா அறிக்கையையும், ஷீலா தீட்சித் மீதான தணிக்கை அறிக்கையையும் ஒப்பிட்டுப் பார்க்கக்கூடாது. எடியூரப்பா பதவி விலக வேண்டும் என்று கேட்பதற்கு எந்த அறிக்கையும் தேவையில்லை. கர்நாடக சுரங்க தொழிலில் என்ன நடந்தது என்று எல்லோருக்கும் தெரியும். அதை வேறு அறிக்கையுடன் ஒப்பிட்டு பார்ப்பது நியாயம் அல்ல. எனவே, ஷீலா தீட்சித் பதவி விலக தேவையில்லை.

தணிக்கை அறிக்கை தற்போது பாராளுமன்றத்தின் முன்பு இருக்கிறது. அறிக்கையை பாராளுமன்றம் பரிசீலிக்கட்டும். என்ன நடவடிக்கை எடுப்பது என்று பாராளுமன்றம் முடிவு செய்யட்டும். அதற்கு நாம் அவகாசம் அளிக்க வேண்டும். அதற்கு முன்பு நாம் விவாதிப்பது சரியல்ல. இவ்வாறு சல்மான் குர்ஷித் கூறினார்.

இதற்கிடையே, டெல்லி மாநில முதல்- மந்திரி ஷீலா தீட்சித், தனது மந்திரிசபையை அவசரமாக கூட்டினார். அதில், தணிக்கை அறிக்கை பற்றி விவாதிக்கப்பட்டது. முன்னதாக, ஒரு நிகழ்ச்சியில் பங்கேற்ற ஷீலா தீட்சித், தணிக்கை அறிக்கையை படிக்கும் வரை அதுபற்றி எந்த கருத்தும் தெரிவிக்க மாட்டேன் என்று கூறினார்.

இது எல்லாம் அரசியலில் சகஜம் .காங்கிரசு செய்தால் தவறே இல்லை .