இலங்கை வானில் வெளிநாட்டு விமானங்கள் ஏதும் பறக்கவில்லை

சபையில் அமைச்சர் பிரியங்கர ஜயரட்ண


கே. அசோக்குமார் - லோரன்ஸ் செல்வநாயகம்

இலங்கையின் வான் பரப்புக்குள் வெளிநாட்டு விமானங்கள் பறந்ததாக கூறப்படும் விடயம்
முற்றிலும் தவறானது. சர்வதேச வான்பரப்புக்குள் இவ்வாறு விமானங்கள் பறந்துள்ளன.
எனினும் அவை இலங்கையின் வான் பரப்புக்குள் பறக்கவில்லை என்பதை பொறுப்புடன்
தெரிவிக்க விரும்புகிறேன் என சிவில் விமான போக்குவரத்து அமைச்சர் பிரியங்கர ஜயரட்ண
நேற்று பாராளுமன்றத்தில் தெரிவித்தார்.
இலங்கையின் வான் பரப்புக்குள் வெளிநாட்டு போர் விமானங்கள் பறந்ததாக அச்சு மற்றும்
இலத்திரனியல் ஊடகங்கள் செய்திகளை வெளியிட்டிரு ந்தன. இதற்கு பதிலளிக்கும் வகையிலேயே
அமைச்சர் பிரியங்கர ஜயரட்ண மேற்கண்டவாறு தெரிவித்தார். பிரதி சபாநாயகர் சந்திம
வீரக்கொடி தலைமையில் நேற்று பாராளுமன்றம் கூடிய போது விசேட அறிக்கையொன்றை
சமர்ப்பித்து பிரியங்கர ஜயரட்ண பேசினார். இச்சம்பவம் தொடர்பாக விசாரணைகளை நடத்தி
அறிக்கையொன்றை சமர்ப்பிக்குமாறு அமைச்சர் பிரியங்கர ஜயரட்ண குழுவொன்றை
நியமித்திருந்தார். இந்த குழுவின் அறிக்கையை அடுத்தே தான் இவ்வாறு உறுதியுடன்
தெரிவிப்பதாகவும் குறிப்பிட்டார்.
இலங்கையின் வான் பரப்பை அண்மித்த சர்வதேச வான் பரப்புக்குள் போர் விமானங்கள்
பறந்துள்ளன. எனினும் அவை இலங்கையின் வான்பரப்புக்குள் பறந்துள்ளதாக கூறப்படுவது
முற்றிலும் தவறானது. அவர்கள் சர்வதேச சிவில் விமான சேவை சட்டத்தை மீறவில்லை என்றும்
அமைச்சர் பிரியங்கர ஜயரட்ண தெரிவித்தார். இந்த விடயம் தொடர்பாக தான்
விளக்கமளிக்காவிடின் இலங்கை சர்வதேச நாடுகளுடன் கொண்டுள்ள இராஜதந்திர உறவுகளில்
பழுது ஏற்படலாம் என்றும் அமைச்சர் பிரியங்கர ஜயரட்ண தெரிவித்தார்.