பயங்கரவாத நிபுணர்களின் தவறுகளும் புதிய கருத்துக்களும்!

பயங்கரவாத நிபுணர்களின் தவறுகளும் புதிய கருத்துக்களும்

August 13, 2011



டென்மார்க் 12.08.2011 சனி மாலை

கடந்த 2001 செப் 11 தாக்குதலுக்குப் பின் பயங்கரவாதம் பற்றிய கொள்கைகளை வகுத்த நிபுணர்கள் இஸ்லாமிய தீவிரவாதம், அதனோடு தொடர்புபட்ட அல் குவைடா, தலபான் பயங்கரவாதம் போன்றவற்றையே பெரிதும் முன்னிலைப்படுத்தி தமது ஊடகங்களை முடுக்கிவிட்டன. ஆனால் அதேவேளை பயங்கரவாதத்திற்கு எதிரான பிரச்சாரங்கள் மேலை நாடுகளில் கடும் வலதுசாரிப் போக்குகளை வேகமாக வளர்த்து சென்றது. பயங்கரவாதத்திற்கு இணையான இந்தப் போக்கை இவர்கள் குறைத்து மதிப்பிட்டுவிட்டதாக இப்போது பயங்கரவாத மதிப்பீட்டு நிபுணர்கள் கருதுவதாக இன்றைய இன்பர்மேசன் கட்டுரை வெளியிட்டுள்ளது.

அல்குவைடா தாக்குதல் நடக்கப் போகிறதென மக்களை உசுப்பேற்றியவர்கள் தம்மிடையே வளரும் இந்த வெள்ளை நிறவாதத்தை தடுக்க வேண்டிய கடமையை வசதியாக புறந்தள்ளியுள்ளார்கள் என்றும் அது சுட்டிக்காட்டியுள்ளது. மக்களுக்கு எது சுவையாக இருக்கிறதோ அந்தப் பக்கம் நோக்கி பயங்கரவாத ஆய்வுகள் அடித்துச் செல்லப்பட்டுள்ளன. நோர்வேயில் பிறீவிக் என்ற கடும் வெள்ளை நிறவாத போக்குடைய இளைஞர் 76 பேரை சுட்டுக் கொன்று, குண்டும் வைத்தபோதுதான் கடந்த பத்தாண்டு கால இமாலய தவறை பயங்கரவாத ஆய்வு நிபுணர்கள் கண்டு கொண்டனர். அதேபோல பயங்கரவாத ஆய்வு சிறீலங்காவில் தப்பாக பயன்படுத்தப்பட்டதும் இப்போது உலகால் உணரப்படுகிறது. பயங்கரவாத தடுப்பு கொள்கைகளுக்கான தகவல்களை திரட்டிய உளவுப் பிரிவினர் செய்த செயல் உலகிற்கு மிகவும் ஆபத்தான வழிகாட்டலாகியுள்ளதையும் அது சுட்டிக்காட்டியுள்ளது.

Written by Thurai · Filed Under Denmark News, News