நிரபராதிகளை விடுவிக்க உடன் நடவடிக்கை அவசியம்

நிரபராதிகளை விடுவிக்க உடன் நடவடிக்கை அவசியம்
அமைச்சர் ஹக்கீமிடம் மன்னார் ஆயர் வலியுறுத்தல்
விசாரணைக்கு உட்படுத்தப்பட்டும், உரிய விசாரணைகள் இன்றியும் பல்வேறு காரணங்களுக்காக தடுத்து வைக்கப்பட்டிருக்கும் அரசியல் கைதிகளை நிரபராதிகள் எனக் காணும் பட்சத்தில் விரைவில் விடுதலை செய்வதற்கு சட்ட பூர்வமான நடவடிக்கைகளைத் துரிதமாக மேற்கொள்வதற்கான சாத்தியக் கூறுகளை கவனத்தில் கொள்ளுமாறு மன்னார் மற்றும் வவுனியா மறை மாவட்டங்களுக்கான ஆயர் பேரருட் திரு இராயப்பு ஜோசப் ஆண்டகை, நீதியமைச்சரும், ஸ்ரீலங்கா முஸ்லிம் காங்கிரஸ் தலைவருமான ரவூப் ஹக்கீமை கொழும்பில் உள்ள அவரது அமைச்சில் செவ்வாய்க்கிழமை சந்தித்து வேண்டுகோள் விடுத்தார். இத்தகைய சந்தேக நபர்கள் பலர் மீது சில வருட காலமாகவே கரிசனை செலுத்தப்படாதிருப்பது பற்றியும் அவர் முறையிட்டார்.

இத்தகைய சிறைக்கைதிகளில் பலர் சம்பந்தப்பட்ட புலன் விசாரணைகள் மேற்கொள்ளப்பட்டு, சட்டமா அதிபர் திணைக்களத்திற்கு பாரப்படுத்தப்பட்டுள்ள போதிலும், மேற்கொண்டு கையாள வேண்டிய நடவடிக்கைகள் திருப்திகரமாக முன்னெடுக்கப்படாதிருப்பதாகவும் ஆயர் கவலை வெளியிட்டார்.

அண்மையில் தாம் வவுனியா சிறைச்சாலைக்குச் சென்று உண்ணாவிரதத்தில் ஈடுபட்டிருந்தவர்களைச் சந்தித்து நீதியமைச்சரையும், சட்டமா அதிபரையும் சந்தித்து இது தொடர்பாக பேசி நடவடிக்கை எடுப்பதாக அளித்த வாக்குறுதியை நிறைவேற்றும் முகமாகவே இந்தச் சந்திப்பில் ஈடுபட்டதாக ஆயர் கூறினார்.

கொழும்பு மகஸின் சிறைச்சாலையிலும், கொழும்பு விளக்கமறியல் சிறையிலும் வைக்கப்பட்டுள்ள கைதிகள் விடயத்தில் கூடுதல் கவனம் செலுத்த வேண்டியதன் அவசியத்தையும் அவர் நீதியமைச்சரிடம் வலியுறுத்தினார்.

ஆயர் இராயப்பு ஜோசப் ஆண்டகை தெரிவித்தவற்றை கவனமாகச் செவிமடுத்த நீதியமைச்சர் ஹக்கீம், இக் கைதிகள் விவகாரம் குறித்து தாம் உரிய கவனம் செலுத்தி வருவதாகவும் பலர் தொடர்பான கோவைகள் ஏற்கனவே பரிசீலிக்கப்பட்டு வருவதாகவும், இது போன்ற விடயங்கள் பாதுகாப்பு அமைச்சுடனும், சட்டமா அதிபர் திணைக்களத்துடனும், சிறைச்சாலைகள் அமைச்சுடனும் தொடர்பு பட்டிருப்பதால் தாமாக தனித்து தீர்மானங்களை மேற்கொள்வதில் நடைமுறைச் சிக்கல்கள் இருந்து வருவதாகவும், எனினும் ஆயர் அவர்கள் முன்வைத்த வேண்டுகோள்கள் பற்றி தாம் உரிய தரப்பினருடன் கலந்தாலோசிப்பதாகவும் தெரிவித்தார். (ஐ)

:”@: :”@:

நல்லது நடந்தால் சரிதான் ##*