இனி அரசு விரைவு பஸ்களில், ஆன்-லைன் மூலம் டிக்கெட் முன்பதிவு செய்யும் வசதி ?

by **நேசமுடன் ஹாசிம்** Tue 6 Sep 2011 - 17:42

அரசு விரைவு பஸ்களில், ஆன்-லைன் மூலம் டிக்கெட் முன்பதிவு செய்யும் வசதியை ஏற்படுத்த,
"இ-பேமென்ட் கேட்வே' தேர்வு செய்வதற்காக, டெண்டர் அறிவிக்கப்பட்டுள்ளது. இதன் மூலம், அரசு விரைவு போக்குவரத்துக் கழக கம்ப்யூட்டர் முன்பதிவு மையங்கள், அரசு போக்குவரத்துக் கழக தலைமையகங்களில் உள்ள முன்பதிவு மையங்கள் ஒருங்கிணைக்கப்பட்டு, ஆன்-லைன் மூலம், டிக்கெட் முன்பதிவு வசதி ஏற்படுத்தப்படும்.சென்னையைத் தலைமையிடமாகக் கொண்டு, அரசு விரைவுப் போக்குவரத்துக் கழகம் செயல்படுகிறது.

இது, தமிழகத்தின், அனைத்து பகுதிகள் மற்றும், ஆந்திரா, கர்நாடகா, கேரளா உள்ளிட்ட அண்டை மாநிலங்களுக்கும் விரைவு பஸ்களை இயக்குகிறது. செமி டீலக்ஸ், சூப்பர் டீலக்ஸ், அல்ட்ரா டீலக்ஸ், "ஏசி' பஸ்கள் என தற்போது, ஆயிரத்திற்கும் மேற்பட்ட பஸ்கள் இயக்கப்படுகின்றன; நாளொன்றுக்கு, ஒரு லட்சம் பேர் பயணிக்கின்றனர்.அரசு விரைவு போக்குவரத்துக் கழக பஸ்களில், கம்ப்யூட்டர் மூலம் முன்பதிவு செய்யும் வசதி, கடந்த 2007ம் ஆண்டு அறிமுகப்படுத்தப்பட்டது. இத்திட்டம், பல்லவன் போக்குவரத்து ஆலோசனைக் குழு மூலம், தமிழகம் முழுவதும் உள்ள, 56 கம்ப்யூட்டர் முன்பதிவு மையங்களில் செயல்படுத்தப்பட்டது.

இத்திட்டம், மக்கள் மத்தியில் அமோக வரவேற்பை பெற்றதைத் தொடர்ந்து, 2008ம் ஆண்டு விழுப்புரம், கும்பகோணம், சேலம், கோவை மற்றும் மதுரையிலுள்ள அரசு போக்குவரத்துக் கழக தலைமையிடங்களில் விரிவுபடுத்தப்பட்டது.இந்நிலையில், இந்த இரண்டு திட்டங்களையும் "இ-பேமென்ட் கேட்வே' மூலம் ஒருங்கிணைத்து, ஆன்-லைன் டிக்கெட் முன்பதிவு வசதியை ஏற்படுத்துவதற்காக, பல்லவன் போக்குவரத்து ஆலோசனைக் குழு டெண்டர் விடுத்துள்ளது.பூர்த்தி செய்யப்பட்ட விண்ணப்பங்களை, 16ம் தேதி மாலை, 3 மணிக்குள் செலுத்த வேண்டும். அன்று மாலை, 3.30 மணிக்கு விண்ணப்பங்கள் பரிசீலனை செய்யப்பட்டு, தகுதி வாய்ந்தவர்கள் தேர்வு செய்யப்பட்டு, பணி ஒப்பந்தம் வழங்கப்படும்.

பயணிகளுக்கு கூடுதல் வசதிரயில்களில் முன்பதிவு செய்வது போல், வீட்டிலிருந்தபடியே, "டெபிட்/கிரெடிட்' கார்டு மூலம் பணத்தைச் செலுத்தி, அரசு விரைவு பஸ்களிலும் முன்பதிவு செய்து கொள்ளலாம். இதன் மூலம் பொதுமக்கள், அரசு விரைவு போக்குவரத்துக் கழக முன்பதிவு மையங்களுக்கு செல்ல வேண்டியதில்லை.தற்போது, அரசு விரைவுப் போக்குவரத்துக் கழகம் மற்றும் அரசு போக்குவரத்துக் கழகங்கள் மூலம், 1,400 பஸ்கள் இயக்கப்படுகின்றன. சராசரியாக நாளொன்றுக்கு, 10 ஆயிரம் சீட்கள், முன்பதிவு செய்யப்படுகின்றன. பண்டிகை நாட்கள், கோடை காலங்களில் முன்பதிவு எண்ணிக்கை அதிகமாக இருக்கிறது. ஆன்-லைன் மூலம் முன்பதிவு வசதி ஏற்படுத்தப்பட்டால், இதன் எண்ணிக்கை மேலும் அதிகரிக்கும் என, எதிர்பார்க்கப்படுகிறது.