கடாபி அரசுக்கு சீனா ஆயுத உதவி

கடாபி அரசுக்கு சீனா ஆயுத உதவி



பீஜிங் மறுப்பு

கடாபி ஆட்சியின் இறுதிக் காலத்தில், அவருக்கு 20 கோடி டொலர் மதிப்பிலான
ஆயுதங்கள்கொடுத்து காப்பாற்ற சீனா முயன்றதாக தகவல்கள் வெளியாகியுள்ளன. லிபியா
இடைக்கால அரசுக்கு உதவிகள் வழங்கும் 63 நாடுகள் கூட்டமைப்பில் சீனாவும் இணைந்துள்ள
தருணத்தில் இத்தகவல்கள், இரு தரப்பு உறவுகளிலும் நெருடல் ஏற்படுத்தும் வகையில்
வெளிவந்துள்ளன.
எதிர்ப்பாளர்களை வீழ்த்த கடாபி போராடிக்கொண்டிருந்த நேரத்தில், கடந்த ஜூலை மத்தியில்
பீஜிங் சென்ற கடாபியின் பிரதிநிதிகள் “சினா நோர்த் இண்டஸ்ரீஸ் கோர்ப்பரேஷன், சீனா
நேஷன் பிரிசிஷன் மெஷின் இம்போர்ட் அண்ட் எக்ஸ்போர்ட் கோப்பரேஷன், சீனா ஷிங்ஜிங்
இம்போர்ட் அண்ட் எக்ஸ்போர்ட் கோர்ப்பரேஷன் ஆகிய சீன அரசு இராணுவத் தளபாடங்கள்
உற்பத்தி நிறுவனங்களுடன் பேச்சுவார்த்தை நடத்தினர்.

ரொக்கெட் லாஞ்சர்கள்,
பீரங்கிகளைத் தகர்க்கும் ஏவுகணைகள், தரையில் இருந்து வானில் உள்ள இலக்கை தாக்கும்
ஏவுகணைகள் ஆகிய 20 கோடி டொலர் மதிப்பிலான ஆயுதங்கள் இவர்களின் பேச்சுவார்த்தையில்
பட்டியலிடப்பட்டன. அதே நேரம், இந்தப் பட்டியலில் உள்ள பெரும்பான்மையான ஆயுதங்கள்,
அல்ஜீரிய இராணுவக் கிடங்குகளில் வைக்கப்பட்டுள்ளதாகவும், அதனால் அங்கிருந்து
லிபியாவுக்கு எளிதில் அனுப்ப முடியும் எனவும் அந்நிறுவனங்கள் தெரிவித்தன.

சில
ஆயுதங்களை, தென்னாபிரிக்கா, அல்ஜீரியா மூலம் கடல் வழியாக லிபியாவுக்கு அனுப்பவும்
அந்நிறுவனங்கள் சம்மதித்துள்ளன. அக்காலகட்டத்தில் லிபியா மீது ஐ. நா. ஆயுதப்
பரிமாற்றத் தடை உத்தரவு பிறப்பித்திருந்தது. இத்தகவல், கடாபியின் உளவுத் துறை
அலுவலகத்தில் கண்டெடுக்கப்பட்ட ஆவணம் ஒன்றின் மூலம் தெரிய வந்துள்ளதாக, கனடாவில்
இருந்து வெளிவரும் “தி களோப் அண்ட் மெயில்” பத்திரிகை தெரிவித்துள்ளது.
இத்தகவல் வெளியானதையடுத்து சீன இராணுவ செய்தித் தொடர்பாளர் ஜியாங் யு நேற்று
விடுத்த அறிக்கையில், “இந்தப் பேச்சுவார்த்தை அரசுக்குத் தெரியாமல் நடந்துள்ளது.
ஆனால், ஆயுதப் பரிமாற்றமோ, அதற்கான ஒப்பந்தமோ மேற்கொள்ளப்படவில்லை’ என்று
தெரிவித்துள்ளார்.