இஸ்ரேல் தூதரகம் மீது எகிப்தில் தாக்குதல்; அதிகாரிகள் நாடு திரும்பினர்

இஸ்ரேல் தூதரகம் மீது எகிப்தில் தாக்குதல்; அதிகாரிகள் நாடு திரும்பினர்



எகிப்தில் உள்ள இஸ்ரேல் தூதரகம் மீது ஆர்ப்பாட்டக்காரர்கள் தாக்குதல் நடத்தியதைத்
தொடர்ந்து அங்குள்ள தூதரக அதிகாரிகள் அனைவரும் உடனடியாக இஸ்ரேலுக்கு திருப்பி
அனுப்பப்பட்டனர்.
எகிப்தில் ஜனநாயக உரிமைகளை உடனடியாக வழங்கக் கோரி பொது மக்கள் தலைநகர் கெய்ரோவில்
போராட்டத்தில் ஈடுபட்டனர். கடந்த வெள்ளிக்கிழமை நடந்த அந்த போராட்டத்தின் போது
கலவரம் வெடித்தது. போராட்டக் காரர்களில் சிலர் இஸ்ரேல் தூதரகத்துக்குள் புகுந்து
தாக்குதல் நடத்தினர். அங்குள்ள ஆவணங்களை தூக்கியெறிந்தனர். மேலும் இஸ்ரேல்
கொடியையும் அங்கிருந்து அகற்றினர். இதனால் அந்த இடம் முழுவதும் கலவர பூமியானது.
இதனைத் தொடர்ந்து அங்கு விரைந்த இராணுவத்தினர் நிலைமையை கட்டுப்பாட்டுக்குள் கொண்டு
வந்தனர். முன்னதாக ரகசிய நடவடிக்கையின் மூலமாக இஸ்ரேல் விமானப்படை விமானம் தூதரக
அதிகாரி இத்சாக் லெவனானையும், அவர் குடும்பத்தையும் அதிரடியாக மீட்டது. அவர்கள்
அனைவரும் சனிக்கிழமை இஸ்ரேல் சென்றடைந்தனர்.
இந் நிலையில் இந்த சம்பவத்தினால் எகிப்துடனான உறவுகளில் எந்த பாதிப்பு ஏற்படாது என
இஸ்ரேல் அறிவித்துள்ளது. இஸ்ரேல் தொடர்ந்து எகிப்துடன் நல்லுறவுகளை பேணும் எனவும்
திருப்பி அழைக்கப்பட்ட தூதுவர்கள் மீண்டும் விரைவில் எகிப்துக்கு அனுப்பப்படுவர்
எனவும் இஸ்ரேல் பிரதமர் பென்ஜமின் நெதன்யாகு தெரிவித்துள்ளார். ஏற்கனவே இஸ்ரேலுக்
கும் துருக்கிக்கும் இடையில் முறுகல் நிலை நீடித்து வருகிறது. கடந்த ஆண்டு இராணுவ
நடவடிக்கையால் துருக்கி பிரஜைகள் கொல்லப்பட்டதற்கு இஸ்ரேல் மன்னிப்பு கேட்காததை
தொடர்ந்து துருக்கி இஸ்ரேலுடனான உறவுகள் அனைத்தையும் துண்டித்துக் கொண்டது. அத்துடன்
தமது கடற்படையுடன் கசாவுக்கு நிவாரண உதவியை அனுப்பவுள்ளதாக துருக்கி பிரதமர்
எர்டோகான் அறிவித்துள்ளார்.