சவூதியில் கார் ஓட்டிய பெண்ணுக்கு கசையடி

தடையை மீறி கார் ஓட்டிய சவூதி அரேபிய பெண்ணுக்கு 10 கசையடிகளை வழங்குமாறு நீதிமன்றம் தீர்ப்பு அளித்துள்ளது. அத்துடன் மேலும் இரு பெண்கள் இதே குற்றச்சாட்டுக்கு இலக்காகியுள்ளனர்.

இந்த தகவலை சர்வதேச மன்னிப்புச் சபை வெளியிட்டுள்ளது.

சவூதி அரேபியாவில் பெண்களுக்கு வாக்குரிமை அளிக்க மன்னர் அப்துல்லா அனுமதி அளித்து இரு தினங்களில் அந்நாட்டு நீதிமன்றம் சர்ச்சைக்குரிய இந்த தீர்ப்பை வழங்கியுள்ளமை குறிப்பிடத்தக்கது.

சவூதி அரேபியாவில் பெண்களுக்கு வாகனம் ஓட்டுவதற்கு விதிக்கப்பட்டுள்ள தடைக்கு எதிராக அண்மைக் காலமாக கடும் எதிர்ப்பு கிளம்பி வருகிறது. இந்த தடையை எதிர்த்து பல பெண்கள் அங்கு வாகனங்களை ஓட்டி பிரசாரம் செய்து வருகின்றனர்.

இதில் தடையை மீறி வாகனத்தை ஓட்டிய பல பெண்களையும் பொலிஸார் தடுத்து நிறுத்தியுள்ளனர். இவ்வாறு வாகன மோட்டிய பெண்களிடம் இனி மேல் வாகனமோட்டக் கூடாது என கையொப்பம் எடுத்து விட்டு விட்டு விடுகின்றனர்.

இந் நிலையில் நீதிமன்றத்தில் முதல் முறையாக பெண் ஒருவருக்கு தண்டனை வழங்கப்பட்டுள்ளது. கடந்த ஜுலை மாதம் ஜித்தா நகரில் வாகனம் ஓட்டிய ஷெமா என்ற பெண்ணே இவ்வாறு கசையடி தண்டனைக்கு இலக்காகியுள்ளதாக செய்திகள் தெரிவிக்கின்றன. இவ்வாறு வாகனமோட்டிய குற்றத்திற்கு உள்ளான ரஜ்லா ஹரிரி என்ற பெண் ராய்ட்டருக்கு கூறும்போது, “தடையை மீறி காரோட்டிய குற்றத்திற்கு விசாரணை செய்ய பொலிஸார் எனக்கு அழைப்பு விடுத்தனர். அங்கு மீண்டும் வாகனம் செலுத்த மாட்டேன் என பொலிஸாரிடம் ஒப்புதல் அளித்ததன் பின் என்னை விடுவித்தனர். நான் தேவைக்காகவே கார் ஓட்டினேன். சட்டத்திற்கு எதிராகவல்ல.” என்று குறிப்பிட்டார்.

சவூதி அரேபிய சட்டத்தின்படி பெண் ஒருவர் வெளியே செல்ல, வெளிநாடு செல்ல ஆண் பாதுகாவலர் ஒருவர் தேவையாகும்.

எவ்வாறாயினும் பெண்கள் வாகனமோட்டக் கூடாது என்று சவூதி அரேபிய சட்டத்தில் எழுதப்படவில்லை. எனினும் வாகனம் ஓட்டுவதற்கான ஓட்டுனர் அனுமதிப்பத்திரம் பெண்களுக்கு விநியோகிக்க தடையுள்ளதென்பது குறிப்பிடத்தக்கது.

கருத்துக் கூற முடியவில்லை நாட்டில் சட்டமென்றால் பின்பற்றித்தான் ஆகவேண்டும்