தயாசிறியை சபையிலிருந்து வெளியேற்ற தலைமை தாங்கிய அஸ்வர் உத்தரவு

by **நேசமுடன் ஹாசிம்** Fri 7 Oct 2011 - 10:01

சபையை விட்டும் வெளியேற்றுமாறு உத்தரவிட்டும் வெளியேறாது ஐ. தே. க. பாராளுமன்ற உறுப்பினர் தயாசிறி ஜயசேகர தொடர்ந்தும் சபையில் கோஷமெழுப்பியதால் நேற்று மாலை பாராளுமன்றத்தில் பெரும் அல்லோ லகல்லோலம் ஏற்பட்டது.

அமைச்சர் மேர்வின் சில்வா அடங்கலான ஆளும் தரப்பு அமைச்சர்கள் சிலர் சபையின் நடுப்பகுதிக்கு வந்து தயாசிறி ஜயசேகர வுக்கு எதிராக குரல் கொடுத்ததையடுத்து இரு தரப்பினருக்கு மிடையே வாய்த் தர்க்கம் உக்கிரம டைந்து மோதல் ஏற்படும் நிலை உரு வானது. இந்நிலையில் சபைக்கு தலைமை வகித்த ஏ. எச். எம். அஸ்வர் எம்.பி. சபையை 10 நிமிடங்களுக்கு ஒத்திவைத்தார்.

இருந்தா லும் 25 நிமிடங்களின் பின்னரே சபை மீண்டும் கூடி சுமூகமாக நடை பெற்றது. தேசிய பொலிஸ் அகடமி சட்ட மூலம் தொடர்பான விவாதத்தில் உரையாற்றிய ஐ. தே. க. எம்.பி. தயாசிறி ஜயசேகர ஜனாதிபதியின் புகைப்பட மொன்றைக் காண்பித்து உரையாற்றினார்.

கொடிகாவத்த முல்லேரியா பகுதியில் அமைக்கப்பட்டிருந்த ஜனாதிபதியின் கட்டவுட்டிற்கு ஏற்படுத்தப்பட்டிருந்த சேதம் குறித்து கருத்துத் தெரிவித்தார். இதற்கு ஆளும் தரப்பினர் ஆட்சேபம் தெரிவித்து கோஷமெழுப்பினர்.

இதனையடுத்து சபைக்கு தலைமை வகித்த ஏ. எச். எம். அஸ்வர் எம்.பி. குறித்த புகைப்படத்தை தருவித்து பரிசோதித்தார். ஜனாதிபதியின் உருவப்படத்திற்கு துப்பாக்கிக் சூடு நடத்தியதாக எந்த சான்றும் தெரியவில்லை எனவும் அதில் பேனாவினால் அடையாளமிடப்பட்டுள்ளது என்றும் தெரிவித்த ஏ. எச். எம். அஸ்வர் எம்.பி., தயாசிறி ஜயசேகர எம்.பி. பொய்க் குற்றச்சாட்டு கூறியதால் அவரின் உரையை ஹன்சாடிலிருந்து முழுமையாக நீக்குவதாக அறிவித்தார்.

இதனையடுத்து அமைச்சர் ரவூப் ஹக்கீம் உரையாற்றினார் :- ஆனால் தயாசிறி ஜயசேகர எம்.பி. சபையில் தொடர்ந்து கோஷமெழுப்பி சபைத் தலைமையின் முடிவை விமர்சித்தார். இதனையடுத்து அவருக்கு சபையை விட்டு வெளியேற உத்தரவிடப்பட்டது. அவர் வெளியேறாததையடுத்து சபையை விட்டும் வெளியேற்ற ஏ. எச். எம். அஸ்வர் எம்.பி. உத்தரவிட்டார்.

இந்த உத்தரவையும் அவர் செவிமடுக்காது கோஷமெழுப்பினார். உதவி படைக்கல சேவிதர் சபை தலைமை ஆசனத்தை நோக்கி நடந்து வருவதையடுத்து எதிர் தரப்பினர் தயாசிறி ஜயசேகர எம்.பியை சுற்றி நின்றனர்.

இந்த நிலையில் இரு தரப்பினருக்குமிடையில் வாய்த்தர்க்கம் ஏற்பட்டு குழப்பநிலை உருவானது. தயாசிறி ஜயசேகர எம்.பி. வெளியேறாததையடுத்து சபைக்கு தலைமை வகித்த ஏ. எச். எம். அஸ்வர் எம்.பி. சபையை 10 நிமிடங்களுக்கு ஒத்திவைத்தார்.