வலுவான லோக்பால் மசோதா உறுதி: ஹசாரேவுக்கு பிரதமர் கடிதம்

"வலுவான லோக்பால் மசோதாவை, பார்லிமென்டில் நிறைவேற்ற, அரசு உறுதி பூண்டுள்ளது. அதே நேரத்தில், தேர்தல் சீர்திருத்தம் உள்ளிட்ட விஷயங்களில் அரசியல் கட்சிகளிடையே ஒருமித்த கருத்தை உருவாக்க வேண்டிய அவசியம் உள்ளது,'' என, காந்தியவாதி அன்னா ஹசாரேவுக்கு, பிரதமர் மன்மோகன் சிங் கடிதம் எழுதியுள்ளார்.

சமூக சேவகரும், காந்தியவாதியுமான அன்னா ஹசாரே, வலுவான லோக்பால் மசோதா கொண்டு வர வலியுறுத்தி, உண்ணாவிரதப் போராட்டம் நடத்தினார். தற்போது, அரியானா ஹிசார் இடைத்தேர்தலில், காங்கிரசுக்கு எதிராக, அன்னா ஹசாரே குழுவினர் பிரசாரம் மேற்கொண்டுள்ளனர்.இதனால், காங்கிரஸ் தரப்பு அதிருப்தியடைந்துள்ளது. இந்நிலையில், பிரதமர் மன்மோகன் சிங், ஹசாரேவுக்கு கடிதம் எழுதியுள்ளார்.

அதில் கூறப்பட்டுள்ளதாவது:வலுவான லோக்பால் மசோதா கொண்டுவர வேண்டும் என, மத்திய அரசு உறுதி கொண்டுள்ளது. அரசின் கொள்கை, லோக்பால் மசோதாவுடன் நின்றுவிடாது. நிலம் கையகப்படுத்துதல் மற்றும் தேர்தல் சீர்திருத்தம் குறித்த சட்டங்களும் அரசின் கொள்கையாக உள்ளது.எம்.எல்.ஏ., மற்றும் எம்.பி.,க்களை நிராகரிக்கும் உரிமை, மக்களுக்கு வழங்கப்பட வேண்டும் என, உங்கள் தரப்பில் இருந்து வலியுறுத்தப்படுகிறது. இதுபோன்ற தேர்தல் சீர்திருத்த முறைகளை நடைமுறைப்படுத்த வேண்டும் என அரசும் விரும்புகிறது. ஆனாலும், இதுபோன்ற விஷயங்களில், அனைத்து அரசியல் கட்சிகளிடையே ஒருமித்த கருத்தை உருவாக்க வேண்டிய அவசியம் ஏற்பட்டுள்ளது.இவ்வாறு மன்மோகன் சிங் கடிதத்தில் தெரிவித்துள்ளார்.