போலீஸ் பிடியில் இருந்து தப்பி ஓடிய வாலிபர் வேன் மோதி பலி: போலீஸ் குவிப்பு

by *சம்ஸ் Sat 15 Jan 2011 - 6:25

திருநெல்வேலி : போலீஸ் பிடியில் இருந்து தப்பிஓடிய வாலிபர் வேன் மோதி பலியானார். சென்னை, புழல் பகுதியை சேர்ந்த முருகன் என்பவரது மகன் வினோத்குமார்(20). மைனர் பெண் கடத்தல் வழக்கில் வினோத்குமாரை கைது செய்த போலீசார் அவனை நேற்று இரவில் நெல்லை மாவட்டம், நாங்குநேரி கோர்ட்டில் ஆஜர்படுத்தினர். பின்னர் நள்ளிரவில் நாங்குநேரி கிளைச்சிறையில் அடைப்பதற்காக பாதுகாப்பு போலீசார் அழைத்துவந்தனர். அப்போது வினோத்குமார் போலீஸ் பிடியில் இருந்து தப்பி கோர்ட் வளாகத்தை தாண்டி வெளியே ஓடினான். நெல்லை-திருவனந்தபுரம் நான்குவழிச்சாலையை ஒட்டியே கோர்ட் உள்ளதால் , திருவனந்தபுரத்தில் இருந்து ஈரோடு நோக்கிச்சென்ற வேன் வினோத்குமார் மீது பயங்கரமாக மோதியது. இதில் வினோத்குமார் சம்பவ இடத்திலேயே இறந்தான். போலீசார் கண்காணிப்பில் இருந்தபோது கைதி இறந்த சம்பவம் அங்கு பரபரப்பை ஏற்படுத்தியது. வினோத்குமார் உடல் தற்போது பிரேதபரிசோதனைக்காக நெல்லை மருத்துவக்கல்லூரி ஆஸ்பத்திரியில் வைக்கப்பட்டுள்ளது. அவரது பெற்றோர்களுக்கு தகவல் தெரிவிக்கப்பட்டுள்ளது. அவரது உறவினர்கள் உடலை வாங்காமல் மறியல் செய்யக்கூடும் என்பதால் போலீசார் குவிக்கப்பட்டுள்ளனர்.

நன்றி தினமலர்