பதவிக்காலத்தை இரண்டாக பகிர்ந்தளிக்க மு.கா. தீர்மானம்

கல்முனை மாநகர மேயராக முதல் இரண்டு வருடங்களுக்கு சாய்ந்தமருதைச் சேர்ந்த மீராசாகிப் சிராஸை நியமிப்பதென தீர்மானிக்கப்பட்டுள்ளதாக ஸ்ரீலங்கா முஸ்லிம் காங்கிரஸின் தவிசாளரும், பிரதியமைச்சருமான பசீர் சேகுதாவூத் தெரிவித்தார்.

கல்முனை மாநகர சபையின் சர்ச்சைக்குரிய மேயர் விவகாரம் தொடர்பாக நேற்று காலை ஸ்ரீலங்கா முஸ்லிம் காங்கிரஸின் தலைவரும், அமைச்சருமான ரவூப் ஹக்கீம் தலைமையில் நடைபெற்ற கூட்டத்திலேயே இத்தீர்மானம் எடுக்கப் பட்டுள்ளது.

இக்கூட்டத்தில் தலைவரும் அமை ச்சருமான ரவூப் ஹக்கீம், மற்றும் தவிசாளரும் பிரதியமைச்சருமான பசீர் சேகுதாவூத், கட்சியின் செயலாளரும் பாராளுமன்ற உறுப்பினருமான எம்.ரி. ஹஸன் அலி ஆகியோர்கள் கலந்து கொண்டனர். இக்கூட்டத்தில் கல்முனை மாநகர மேயர் நியமன விவகாரம் விரிவாக ஆராயப்பட்டது.

கல்முனை மாநகர சபை தேர்தலில் ஸ்ரீலங்கா முஸ்லிம் காங்கிரஸ் சார்பாக சாய்ந்தமருதிலிருந்து போட்டியிட்ட சிராஸ் மற்றும் கல்முனையிலிருந்து போட்டியிட்ட சட்டத்தரணி நிசாம் காரியப்பர் ஆகிய இருவரும் அதிக விருப்பு வாக்குகளை பெற்றவர்கள் என்றே ஸ்ரீலங்கா முஸ்லிம் காங்கிரஸ் கருதுகின்றது.

இதனால் மேயர் பதவிக்காலமான நான்கு வருடங்களை இரண்டாக பிரித்து அதிக விருப்பு வாக்குகளில், அதிக விருப்பு வாக்குகளைப்பெற்ற சாய்ந்தமருதைச் சேர்ந்த சிராசுக்கு முதல் இரண்டு வருடங்களுக்கும் அடுத்த இரண்டு வருங்களுக்கு சட்டத்தரணி நிசாம் காரியப்பருக்கும் மேயர் பதவியை வழங்குவதெனவும் இக்கூட்டத்தில் தீர்மானித்துள்ளது.

கட்சிக்கு வழங்கிய முன்னுரிமையின் அடிப்படையிலேயே இத்தீர்மானம் எடுக்கப்பட்டுள்ளது.

வரலாற்றைக் கருத்திற்கொண்டும், சாய்ந்தமருதுக்கு மேயர் பதவி இதுவரை வழங்கப்படாததை கருத்திற்கொண்டும் இத்தீர்மானம் எடுக்கப்பட்டுள்ளது.

மேயர் சர்ச்சை தொடர்பில் இடம்பெற்ற அனைத்து வன்முறைச் சம்பவங்களையும் ஸ்ரீலங்கா முஸ்லிம் காங்கிரஸ் வன்மையாக கண்டிக்கின்றது.

வன்முறைகளை அடிப்படையாகக் கொண்டு எந்த பதவிகளையும் ஸ்ரீலங்கா முஸ்லிம் காங்கிரஸ் வழங்காது எனவும் இத்தீர்மானம் தொடர்பில் கட்சி உத்தியோகபூர்வமாக அறிவிக்குமெனவும் கட்சியின் தவிசாளரும் பிரதியமைச்சருமான பசீர் சேகுதாவூத் மேலும் தெரிவித்தார்.