சிறையில் அடைக்கப்பட்டபோது எடியூரப்பாவுக்கு நெஞ்சுவலி; ஆஸ்பத்திரியில் அனுமதி

by **நண்பன்** Sun 16 Oct 2011 - 9:23

கர்நாடக முதல்- மந்திரியாக இருந்த எடியூரப்பா மீது நிலமோசடி புகார்
கூறப்பட்டது. இதுபற்றி லோக் ஆயுக்தா விசாரணை நடத்தி எடியூரப்பா மீதான
குற்றச்சாட்டுக்கு ஆதாரம் இருப்பதாக தெரிவித்தது. இதனால் எடியூரப்பா பதவி
விலகினார். அவர் மீது லோக் ஆயுக்தா விசேஷ கோர்ட்டில் வழக்கு தொடரப்பட்டது.
வழக்கு விசாரணையை எதிர்த்து ஐகோர்ட்டில் எடியூரப்பா முறையிட்டு தடை
வாங்கினார்.

பின்னர் தடையை ஐகோர்ட்டு
விலக்கிக்கொண்டது. இதனால் எடியூரப்பா விசேஷ கோர்ட்டில் முன் ஜாமீன் கேட்டு
மனுதாக்கல் செய்தார். மனுவை தள்ளுபடி செய்த கோர்ட்டு எடியூரப்பாவை கைது
செய்யுமாறு பிடிவாரண்டு பிறப்பித்து உத்தரவிட்டது. இதையடுத்து எடியூரப்பாவை
உடனடியாக கைது செய்யும் நடவடிக்கையில் இறங்கினர். நேற்று பிற்பகலில்
பெங்களூர் ரேஸ்கோர்ஸ் ரோட்டில் உள்ள வீட்டில் அவரை தேடி போலீசார் சென்றனர்.

அங்கு அவர் இல்லாததால் போலீசார் திரும்பினர். இந்த
நிலையில் மாலை 5 மணிக்கு எடியூரப்பா விசேஷ கோர்ட்டுக்கு சென்று சரண்
அடைந்தார். அவரை வருகிற 22-ந்தேதி வரை நீதிமன்ற காவலில் வைக்க நீதிபதி
சுரேந்திரராவ் உத்தரவிட்டார். இதைத்தொடர்ந்து போலீசார் அவரை கோர்ட்டில்
இருந்து ஜீப்பில் ஏற்றி அழைத்துச் சென்றனர். பெங்களூர் பரப்பன்னா
அக்ரகாரத்தில் உள்ள மத்திய சிறையில் அடைந்தனர்.

அவருக்கு
விசாரணை கைதி எண்.10964 கொடுக்கப்பட்டது. எடியூரப்பாவுக்கு 68 வயது
ஆகிறது. சிறையில் அடைக்கப்பட்டதும் அவர் தூக்கமின்றி தவித்தார். அதிகாலை
1.45 மணிக்கு திடீர் என்று நெஞ்சுவலி ஏற்பட்டது. அவரது ரத்த அழுத்தம்
அதிகரித்து இரண்டு தடவை வாந்தி எடுத்தார். இதைத் தொடர்ந்து ஜெயில்
அதிகாரிகள் அவரை ஆம்புலன்சில் ஏற்றி ஜெயதேவா தனியார் ஆஸ்பத்திரியில்
சேர்த்தனர். டாக்டர்கள் அவரை பரிசோதித்து அவசர சிகிச்சை பிரிவில்
சேர்த்தனர்.

அவரது ரத்த அழுத்தத்தை அடிக்கடி
டாக்டர்கள் பரிசோதித்து சிகிச்சை அளித்தனர். தற்போது அவரது உடல்நிலை நன்றாக
உள்ளதாக டாக்டர்கள் அறிவித்துள்ளனர். நில மோசடி வழக்கில் எடியூரப்பாவுடன்
சேர்ந்து முன்னாள் மந்திரி கிருஷ்ணய்ய ஷெட்டிக்கும் பிடிவாரண்டு
பிறப்பிக்கப்பட்டது. கோர்ட்டுக்கு வந்து இருந்த அவர் இதைக்கேட்டதும்
கோர்ட்டில் மயங்கி விழுந்தார். அவருக்கு முதல் உதவி சிகிச்சை
அளிக்கப்பட்டது. பின்னர் வேனில் பெங்களூர் மத்திய சிறைக்கு கொண்டு சென்ற
அடைத்தனர்.

இதே வழக்கில் எடியூரப்பாவின் மகன்கள்
ராகவேந்திரா எம்.பி., விஜயேந்திரா மருமகன் சோகன்குமார் உள்பட 12 பேருக்கு
நீதிபதி ஜாமீன் வழங்கினார். ரூ.5 லட்சம் ரொக்க ஜாமீன் மற்றும் சாட்சிகளை
கலைக்கக்கூடாது, வெளிநாடுகளுக்கு செல்லக்கூடாது என்று 12 பேருக்கு நிபந்தனை
விதிக்கப்பட்டது.