திருட்டு போன ரகசிய எண்களின் கிரடிட் மற்றும் டெபிட் கார்டுகளை ஐசிஐசிஐ வங்கி திரும்ப பெற்றது

வாடிக்கையாளர்களின் ரகசிய எண்கள், தகவல்கள் திருட்டு போவதாக சென்னை மாநகர போலீஸ் எச்சரிக்கை விடுத்துள்ளது. அதனால் நூற்றுக்கணக்கான கிரடிட் மற்றும் டெபிட் கார்டுகளை ஐசிஐசிஐ வங்கி திரும்ப பெற்றுள்ளது.
இதையடுத்து சில தனியார், அரசு வங்கிகளும் இதற்கான முதற்கட்ட வேலைகளில் இறங்கியுள்ளன. திரும்ப பெற்ற கார்டுகளில் எண்கள் மாற்றப்பட்டு புதிய கார்டுகள் வழங்கப்படுகின்றன.

இது குறித்து மத்திய கிரைம் பிராஞ்ச் துணை ஆணையர் ராதிகா கூறுகையில், அண்மை காலமாக தொழில்நுட்பத்தை தவறாக பயன்படுத்தி கிரடிட், டெபிட் கார்டுகளின் ரகசிய எண்களை சில கும்பல்கள் திருடுகின்றன. ரகசிய எண், தகவல்களை திருடப்பட்டு பணத்தை இழந்ததாக 64 பேர் புகார் கொடுத்துள்ளனர். இந்நிலையில் ஏடிஎம்களில் இருந்து வாடிக்கையாளர்களின் டெபிட் கார்டின் ரகசிய எண்களை திருடியதாக இலங்கையை சேர்ந்த உமேஸ், அவனது கூட்டாளிகள் 4 பேரை போலீசார் கைது செய்துள்ளனர்.

இதேபோன்று மேலும் பல கும்பல்கள் சென்னை மற்றும் இதர நகரங்களில் இருக்கலாம் என நம்புகிறோம். எனவே, இது குறித்து வங்கிகளுக்கு எச்சரிக்கை விடுத்துள்ளதுடன், வாடிக்கையாளர் ரகசிய எண்ணை மாற்ற ஆலோசனை கூறியுள்ளதாக ராதிகா தெரிவித்தார். வாடிக்கையாளரின் நலனை கருத்தில் கொண்டு கடந்த வாரத்தில் சில டெபிட், கிரடிட் கார்டுகள் திரும்ப பெறப்பட்டன. மேலும் பிரச்னை ஏற்பட வாய்ப்புள்ள சிலவற்றை திரும்ப பெறுவதற்கான நடவடிக்கையில் வங்கி இறங்கியுள்ளது. அத்துடன் திரும்ப பெற்ற கார்டுகளில் எண்கள் மாற்றப்பட்டு 6 நாட்களுக்குள் வாடிக்கையாளரிடம் வழங்கப்படும். இதற்கு எந்த கட்டணமும் கிடையாது.

கார்டுகளில் ஏதேனும் பிரச்னை ஏற்படுவதாக அறிந்தால் உடனே வங்கியை தொடர்பு கொள்ளலாம். ரகசிய எண்கள் விஷயத்தில் வாடிக்கையாளர் மிகவும் கவனமாக இருக்க வலியுறுத்தப்பட்டு உள்ளது. அதற்காக டெபிட், கிரடிட் கார்டுகளை பயன்படுத்த அஞ்ச வேண்டாம் என ஐசிஐசிஐ செய்தி தொடர்பாளர் தெரிவித்துள்ளார். கிரடிட், டெபிட் கார்டுகளின் எண்கள் மற்றும் தகவல்கள் திருட்டை ஒழிக்க நகர போலீசுடன் நாஸ்காம் இணைந்து செயல்படும் என அதிகாரிகள் தெரிவித்துள்ளனர்.