இது கம்மல் அல்ல காதல்!

by **பார்த்திபன்** Fri 28 Oct 2011 - 21:51

வலிய வந்து பழகி எந்தன் வலியனைத்தும் துடைத்தாய்!
விழியழகை வைத்தே எனை விடிய விடிய வதைத்தாய்!

சிரிப்பு எனும் சிதை மூட்டி என் சின்ன இதயம் சிதைத்தாய்!
கள்ளிக்காடாய் கிடந்த நெஞ்சில் காதல் விதையை விதைத்தாய்!

கணவன் என்றால் நீதான் என்று காதின் ஓரம் கதைத்தாய்!
காதல் கணைகள் கண்ணில் தொடுத்து கனவை என்னுள் வளர்த்தாய்!

மீசை விலக்கி முத்தம் தந்து மீண்டும் தரவா என்றாய்!
மரம்கொத்திப் பறவை போல மனதைக் கொத்தித் தின்றாய்!

திங்களிரண்டு கடந்தபின்பு திசையை மாற்றிப் பறந்தாய்!
திரண்டு வந்த வெண்ணைத் தாழி திடீரென்று உடைத்தாய்!

சீமை மாமன் திரும்பிவர சீக்கிரம் என்னை மறந்தாய்!
சீனச் சுவராய் வளர்த்த கனவை சீட்டுக்கட்டாய் சரித்தாய்!

காதலன் என்னைக் கைவிட நினைத்த காரணத்தைக் கூறு!
காசைப் பார்த்துப் பாசம் வந்தால் அது காதல் அல்ல வேறு!

அணைத்தவளே அறுத்ததனால் அடிமனதில் கீறல்!
நீ நினைக்கும்போது கழற்றிவிட இது கம்மல் அல்ல காதல்!

நிலவை.பார்த்திபன்

by **அ.இராஜ்திலக்** Sat 29 Oct 2011 - 8:13

வலியை உணரமுடிகிறது கருத்து சொல்ல இயலவில்லை

by **நேசமுடன் ஹாசிம்** Sat 29 Oct 2011 - 8:23

அசத்தலான கவிதை இப்படித்தவிக்க விட்டு களட்டிவிட்டு வேடிக்கை பார்க்கும் பெண்களுக்கு அச்சாணி அடித்ததாய் விழும் வரிகள் மிக மிக அருமை நன்றிகள்

by **நண்பன்** Sat 29 Oct 2011 - 9:12

காதலன் என்னைக் கைவிட நினைத்த காரணத்தைக் கூறு!
காசைப் பார்த்துப் பாசம் வந்தால் அது காதல் அல்ல வேறு!

அணைத்தவளே அறுத்ததனால் அடிமனதில் கீறல்!
நீ நினைக்கும்போது கழற்றிவிட இது கம்மல் அல்ல காதல்!

வாவ் ஒவ்வொரு வரிகளும் பிரமாதம் அருமையாக உள்ளது வாழ்த்துக்கள் வேதனைகளுடன் கூடிய வரிகள் கற்பனை என்றால் பாராட்டுக்கள் அனுபவம் என்றால் ஆறுதல் அனுதாபங்கள் மிகவும் அருமை இது கம்மல் அல்ல காதல்! 331844