சங்கக்காரவுக்கு முதலிடத்திற்கு முன்னேற வாய்ப்பு: மிஸ்பா, அஜ;மல் முன்னேற்றம்

ஐ.சி.சி. டெஸ்ட் தரவரிசை
சங்கக்காரவுக்கு முதலிடத்திற்கு முன்னேற வாய்ப்பு: மிஸ்பா, அஜ;மல் முன்னேற்றம்


சர்வதேச கிரிக்கெட் கவுன்ஸிலின் (ஐ.சி.சி.) டெஸ்ட் தரவரிசையில் இலங்கை அணியின்
முன்னணி துடுப்பாட்ட வீரர் குமார் சங்கக்காரவுக்கு முதலிடத்திற்கு முன்னேற வாய்ப்பு
ஏற்பட்டுள்ளது.
கடந்த திங்கட்கிழமை நடந்து முடிந்த பாகிஸ்தானுடனான மூன்று போட்டிகளைக் கொண்ட டெஸ்ட்
தொடரில் சோபித்ததைத் தொடர்ந்தே சங்கக்கார முதலிடத்திற்கு முன்னேற வாய்ப்பு
ஏற்பட்டுள்ளது. பாகிஸ்தானுடனான டெஸ்ட் தொடரில் சங்கக்கார 2 சதங்களுடன் மொத்தமாக 516
ஓட்டங்களைப் பெற்றார்.
இதில் இருநாடுகளுக்கும் இடையிலான மூன்றாவது டெஸ்ட் போட்டியில் அவர் முதல்
இன்னிங்ஸில் 144 ஓட்டங்களை பெற்றதோடு இரண்டாவது இன்னிங்ஸில் 51 ஓட்டங்களை குவித்தார்.
இதன் மூலம் அவர் மேலதிகமாக 26 தரநிலை புள்ளிகளைப் பெற்று இரண்டாவது இடத்தை
தக்கவைத்துக் கொண்டுள்ளார்.
இதன்படி சங்கக்காரவின் மொத்த தரநிலைப் புள்ளிகள் 880 ஆக அதிகரித்துள்ளது. அதாவது
ஐ.சி.சி. டெஸ்ட் தரவரிசையில் முதலிடத்தில் இருக்கும் தென்னாபிரிக்காவில் ஐக் கலிசை
விடவும் சங்கக்காரவுக்கு மூன்று தரநிலை புள்ளிகளே குறைவாக காணப்படுகிறது.
இந்நிலையில் அவுஸ்திரேலிய - தென்னாபிரிக்க அணிகளுக்கு இடையிலான முதலாவது டெஸ்ட்
போட்டி நேற்று கேப்டவுனில் ஆரம்பமானது. இந்த டெஸ்ட்டில் கலிஸ் சோபிப்பது
கட்டாயமாகும். மாராக அவர் இந்த டெஸ்டில் ஓட்டங்கள் குவிக்க தவறினார் சங்கக்காரவுக்கு
முதலிடத்திற்கு முன்னேறலாம்.
இதேபோன்று இலங்கையுடனான டெஸ்ட் தொடரில் சோபித்த பாகிஸ்தான் அணித் தலைவர் மிஸ்பா
உல்ஹக் டெஸ்ட் தரவரிசையில் முன்னேற்றம் கண்டுள்ளார். ஷார்ஜாவில் கடந்த மூன்றாவது
டெஸ்ட் போட்டியில் முஸ்பா உல் ஹக் முதல் இன்னிங்ஸில் 89 ஓட்டங்களை பெற்றதோடு
இரண்டாவது இன்னிங்ஸில் ஆட்டமிழக்காது 9 ஓட்டங்களை குவித்துள்ளார். இதன் மூலம் அவர்
துடுப்பாட்ட வீரர்களுக்கான டெஸ்ட் தரவரிசையில் சகநாட்டு வீரர் யூனிஸ் கானையும்
பின்தள்ளி 4 இடங்கள் முன்னேறியுள்ளார்.
இதன்படி தரவரிசையில் 17 வது இடத்தில் இருந்த மிஸ்பா உல் ஹக் தற்போது 13 வது
இடத்திற்கு முன்னேறியுள்ளார். துடுப்பாட்ட வீரர்களுக்கான டெஸ்ட் தரவரிசையில் சிறந்த
பாக். வீரரின் தரநிலையை மிஸ்பா பெற்றுள்ளார். யூனிஸ்கான் 14 வது இடத்தில்
காணப்படுகிறார்.
மறு புறத்தில் டெஸ்ட் பந்துவீச்சாளர்களுக்கான தரவரிசையில் இலங்கையுடனான தொடரில்
சோபித்த சுழற்பந்து வீச்சாளர் சயீட் அஜ்மல் தனது சிறந்த தரநிலையை பதிவு செய்து
கொண்டுள்ளார். குமார் சங்கக்காரவுடன் இணைந்த தொடர் நாயகன் விருதை வென்ற சயீட் அஜ்மல்
இலங்கையுடனான டெஸ்ட்டில் மொத்தம் 18 விக்கெட்டுகளை வீழ்த்தினார்.
இதில் அவர் கடைசி டெஸ்ட்டில் மொத்தம் 182 ஓட்டங்களுக்கு 7 விக்கெட்டுகளை
வீழ்த்தியதன் மூலம் தரவரிசையில் மூன்று இடங்கள் முன்னேறி 10 இடத்தை பிடித்தார்.
பாகிஸ்தான் பந்துவீச்சாளர் ஒருவரின் சிறந்த தரநிலையும் இதுவாகும்.
சயீட் அஜ்மல் இலங்கையுடனான டெஸ்ட் தொடரில் பங்கேற்கும் போது தரவரிசையில் 23 வது
இடத்தில் காணப்பட்டார். மூன்று டெஸ்ட் போட்டி முடிவின் பின் அவர் 13 இடங்கள்
முன்னேற்றம் கண்டுள்ளமை குறிப்பிடத்தக்கது.
இது தவிர பாக். வேகப்பந்து வீச்சாளர் உமர் குல் மற்றும் இலங்கை வேகபந்து வீச்சாளர்
சானக்க வெலகெதர ஆகியோரும் தரவரிசையில் முன்னேறியுள்ளனர். இலங்கையுடனான மூன்றாவது
டெஸ்ட்டின் இரு இன்னிங்ஸ்களிலும் முறையே 3-76, 2-44 என விக்கெட் வீழ்த்திய உமல்குல்
4 இடங்கள் முன்னேறி 17 வது இடத்தை பிடித்தார்.
அதேநேரம் இந்த டெஸ்ட்டில் மொத்தம் 6 விக்கெட்டுகளை வீழ்த்திய சானக்க வெலகெதர 6
இடங்கள் முன்னேற 41 ஆவது இடத்தை பிடித்தார். பந்து வீச்சாளர்களுக்கான டெஸ்ட்
தரவரிசையில் இலங்கையின் சிறந்த தரநிலை சுழற்பந்து வீச்சாளர் ரங்கன ஹேரத் தொடர்ந்து
தக்கவைத்துக் கொண்டுள்ளார். 626 தரநிலை புள்ளிகளை பெற்றுள்ள ரங்கன ஹேரத் 11 வது
இடத்தில் காணப்படுகிறார்.
இதேவேளை டெஸ்ட் வரலாற்றில் 900 தரநிலை புள்ளிகளை 20 பந்து வீச்சாளராக சாதனை படைக்க
தென்னாபிரிக்க வேக்கபந்து வீச்சாளர் டேல் ஸ்டைனுக்கு வாய்ப்பு ஏற்பட்டுள்ளது. பந்து
வீச்சாளர்களுக்கான டெஸ்ட் தரவரிசையில் 899 தரநிலை புள்ளிகளுடன் முதலிடத்தில்
காணப்படுகிறார்.
இதனிடையே தென்னாபிரிக்க- அவுஸ்திரேலிய அணிகளுக்கு இடையிலான டெஸ்ட் தொடர் நேற்று
ஆரம்பமானது. இதில் ஸ்டெயின் சோபிக்கும் பட்சத்தில் 900 இலக்கை எட்ட முடியும்.
டெஸ்ட் வரலாற்றில் தென்னாபிரிக்கா சார்பில் முன்னாள் வீரர் ஷோன் பொலக் மாத்திரமே
900 தரநிலை புள்ளிகளை பெற்றுள்ளார் என்பது குறிப்பிடத்தக்கது.