ரூபாய் மதிப்பு குறைவதால் பெட்ரோல் விலை அடுத்த மாதம் உயரும்?

by **நண்பன்** Wed 16 Nov 2011 - 9:12

பெட்ரோல் விலை கடந்த 3-ந்தேதி லிட்டருக்கு ரூ.1.80 உயர்த்தப்பட்டது. இதற்கு நாடெங்கும் கடும் எதிர்ப்பு கிளம்பியது.

இந்த
நிலையில் சர்வதேச சந்தையில் கச்சா எண்ணை விலை குறைந்தது. இதனால் ஒரு
லிட்டர் பெட்ரோலுக்கு ரூ.1.85 லாபத்தை எண்ணை நிறுவனங்கள் பெற்றன. அந்த பயனை
நுகர்வோருக்கு வழங்க இந்திய எண்ணை நிறுவனங்கள் நேற்று கூடி முடிவு செய்தன.

இதையடுத்து பெட்ரோல் விலை லிட்டருக்கு ரூ.2.35
குறைக்கப்பட்டது. நேற்று நள்ளிரவு முதல் இந்த விலை குறைப்பு அமலுக்கு
வந்தது. கடந்த 2008 மற்றும் 2009-ம் ஆண்டுகளில் 2 தடவை பெட்ரோல் விலை
லிட்டருக்கு 5 ரூபாய் வீதம் குறைக்கப்பட்டது. அதற்கு பிறகு தற்போதுதான்
பெட்ரோல் விலை மிக அதிக அளவில் குறைக்கப்பட்டுள்ளது.

இந்த
விலை குறைப்பு காரணமாக சென்னையில் ஒரு லிட்டர் பெட்ரோல் ரூ.70.38-க்கு
விற்பனை ஆகிறது. பெட்ரோல் விலை குறைப்பு அனைத்துத் தரப்பு மக்களிடமும்
மகிழ்ச்சியை ஏற்படுத்தி உள்ளது. இந்த நிலையில் எண்ணை நிறுவன அதிகாரிகள்
இன்று ஒரு அதிர்ச்சி தகவலை வெளியிட்டனர்.

இந்திய
ரூபாயின் மதிப்பு கணிசமாக குறைந்து விட்டது. தொடர்ந்து ரூபாய் மதிப்பு
குறைந்ததால் எண்ணை நிறுவனங்கள் இழப்பை சந்திக்க நேரிடும். அத்தகைய சூழ்நிலை
உருவானால் பெட்ரோல் விலையை மீண்டும் உயர்த்துவதைத்தவிர வேறு வழி இல்லை
என்று எண்ணை நிறுவன உயர் அதிகாரி ஒருவர் கூறினார்.

எனவே பெட்ரோல் விலை இதே நிலையில் நீடிக்குமா? அல்லது உயருமா? என்பது 1-ந்தேதி நடக்கும் கூட்டத்தில் தெரிந்து விடும்.