ஆட்சியை காப்பற்றவே அந்நிய முதலீட்டுக்கு அனுமதிக்கவில்லை

அமைச்சர் பிரணாப் முகர்ஜி
சில்லரை வர்த்தகத்தில் அந்நிய நேரடி முதலீட்டிற்கு அனுமதி வழங்கிய முடிவை கைவிட்டதற்குக் காரணம், அதனால் மக்களவைக்கு இடைத்தேர்தல் நடத்தப்படும் சூழலை தவிர்க்கவே என்று நிதியமைச்சர் பிரணாப் முகர்ஜி கூறியுள்ளார்.

டில்லியில் காங்கிரஸ் நாடாளுமன்ற உறுப்பினர்கள் கூட்டத்தில் கலந்து கொண்டு பேசிய போது பிரணாப் முகர்ஜி இவ்வாறு கூறியதாக அக்கூட்டத்தில் கலந்து கொண்ட காங்கிரஸ் கட்சி உறுப்பினர் ஒருவர் தெரிவித்துள்ளார்.

“சில்லரை வர்த்தகத்தில் அந்நிய நேரடி முதலீட்டிற்கு ஆதரவளித்த உறுப்பினர்களிடம் நான் மன்னிப்புக் கேட்டுக் கொள்கிறேன். நாம் எடுத்த முடிவில் உறுதியாக நின்றிருந்தால் அதனால் ஆட்சிக்கு நெருக்கடி ஏற்பட்டிருக்கும். மக்களவைக்கு இடைத்தேர்தல் நடத்தும் நிலையும் உருவாகியிருக்கும் என்று பிரணாப் முகர்ஜி பேசியதாக அந்த உறுப்பினர் கூறியுள்ளார்.

சில்லரை வர்த்தகத்தில் அந்நிய நேரடி முதலீட்டிற்கு ஆளும் கூட்டணியில் உள்ள திரிணாமுல் காங்கிரஸ் கட்சி எதிர்ப்பு தெரிவித்ததை மறைமுகமாக சுட்டிக்காட்டிய பிரணாப், இப்படிப்பட்ட விடயங்களில் கூட்டணிக் கட்சிகளையும் அனுசரித்து நடந்து கொள்ள வேண்டிய அவசியம் உள்ளதென கூறியுள்ளார்.

அந்நிய நேரடி முதலீட்டை எதிர்த்து கொண்டுவரப்பட்ட தள்ளிவைப்புத் தீர்மானத்தை ஆதரிப்பது என்று திரிணாமுல் காங்கிரஸ் கட்சி முடிவு செய்த நிலையிலேயே இம்முடிவு எடுக்கப்பட்டதாக பிரணாப் தெரிவித்துள்ளார்.

ஆயினும் சில்லரை வர்த்தகத்தில் அந்நிய நேரடி முதலீட்டிற்கு அனுமதியளிப்பது என்கிற முடிவு தள்ளித்தான் போடப்பட்டுள்ளது என்றும், நிரந்தரமாக கைவிடப்படவில்லை என்றும் பிரணாப் முகர்ஜி கூறியுள்ளார்.

பாவம் முதுகெலும்பு இல்லாதவர்கள் மத்தியில் ஆள்வது துரதிர்ஷ்டமே