ஜனாதிபதியாக அறிவித்துக் கொண்டார் எதிர்க்கட்சித் தலைவர்

மத்திய ஆபிரிக்க நாடான கொங்கோவில், தேர்தல் முடிவுக்கு எதிர்ப்புத் தெரிவித்து எதிர்க்கட்சித் தலைவர் எடின்னி ஷிசேகேடி தன்னைத் தானே ஜனாதிபதியாக அறிவித்துக் கொண்டார்.

கொங்கோ நாட்டில் கடந்த நவம்பர் 28ம் திகதி ஜனாதிபதி பதவிக்கான தேர்தல் நடைபெற்றது. இந்தத் தேர்தலில் 2001லிருந்து ஜனாதிபதியாக இருந்துவரும் ஜோசப் கபிலா 49 சதவீத வாக்குகள் பெற்றதாகவும், அவரை எதிர்த்துப் போட்டியிட்ட எடினனி ஷிசேகேடி 32.3 சதவீத வாக்குகள் பெற்றதாகவும் கடந்த வெள்ளிக்கிழமை அறிவிக்கப் பட்டது.

இந்த முடிவை நிராகரித்து ள்ள எதிர்க்கட்சித் தலைவர் எடின்னி ஷிசேகேடி தன்னைத் தானே ஜனாதிபதியாக அறிவித்துக் கொண்டுள்ளார். தேர்தலில் மூன்றாமிடம் பிடித்த விட்டல் காமர்ஹி, ஷிசேகேடிக்கு ஆதரவு தெரிவித்துள்ளார்.

எடின்னி ஷிசேகேடி “இந்த முடிவு மக்களை கோபமூட்டியுள்ளது. இதை நான் நிராகரிக்கிறேன்.

இப்போதிலிருந்து நானே ஜனாதிபதியாகிறேன். என்னைத் தொடர்ந்து ஊக்குவித்து வரும் சர்வதேச சமூகத்திடம் இந்தப் பிரச்சினைக்கு ஒரு தீர்வு கூறுமாறும் கொங்கோ மக்களின் ரத்தம் மீண்டும் சிந்தப்படாமல் இருக்க நடவடிக்கைகள் எடுக்குமாறும் கேட்டுக்கொள்கிறேன்” என்று தெரிவித்தார்.

தேர்தல் முடிவுக்கு எதிர்ப்புத் தெரிவித்து பிரதான எதிர்க்கட்சிகள் அரசுக்கு எதிராக வன்முறையில் ஈடுபட்டு வருகின்றன. ஷிசேகேடி கட்சியின் தலைமையகம் உள்ள லிமிடே நகரில் துப்பாக்கிச் சூடு நடந்ததாகத் தெரிகிறது.