சதாம் ஹுசைன் கிராமத்தின் பெயர் மாற்றக்கூடாது: கிழக்கு மாகாண அமைச்சரவை தீர்மானம்

ஏறாவூர், சதாம் ஹுசைன் கிராமத்தின் பெயரை மாற்ற கூடாது என கிழக்கு மாகாண அமைச்சரவை தீர்மானித்துள்ளதாக அமைச்சரவை பேச்சாளர் எம்.எஸ்.உதுமாலெப்பை தமிழ்மிரர் இணையத்தளத்திற்கு தெரிவித்தார்.

கிழக்கு மாகாண அமைச்சரவை கூட்டம் இன்று புதன்கிழமை மாலை திருகோணமலையில் இடம்பெற்றது. இதன்போது மாகாண சுகாதார அமைச்சர் எம்.எஸ்.சுபையிர் ஏறாவூர், சதாம் ஹுசைன் கிராமத்தின் பெயரை மாற்ற கூடாது தொடர்பிலான முன்வொழிவை சமர்ப்பித்தார் என அவர் குறிப்பிட்டார்.

இதனயைடுத்து, குறித்த முன்மொழிவு ஏகமனதாக அங்கீகரிக்கப்பட்டதாக அவர் குறிப்பிட்டார்.

குறித்த தீர்மானம் ஏறாவூர் பற்று பிரதேச சபைக்கு உடனடியாக அனுப்பப்படவுள்ளதாக எம்.எஸ்.உதுமாலெப்பை மேலும் தெரிவித்தார்.

1978ஆம் ஆண்டு மட்டக்களப்பு மாவட்டத்தில் ஏற்பட்ட சூறாவளி அனர்த்தத்தையடுத்து, பாதிக்கப்பட்ட மக்களுக்கு உதவ முன்வருமாறு அன்றைய ஈராக் ஜனாதிபதி சதாம் ஹூஸைனிடம் மட்டு. மாவட்ட நாடாளுமன்ற உறுப்பினர் அஹமட் பரீட் மீராலெப்பை ஈராக்குக்கு விஜயம் மேற்கொண்டு வேண்டுகோள் விடுத்தார்.

இதன் பிரகாரம் ஏறாவூர்ப் பிரதேசத்தைச் சேர்ந்த 100 முஸ்லிம் குடும்பங்களுக்கு மாதிரிக் கிராமமொன்றை அமைத்துக் கொடுக்க அன்றைய ஈராக் அரசாங்கம் முன்வந்தது.

இதற்கிணங்க பள்ளிவாசல், மத்ரஸா மற்றும் விளையாட்டு மைதானம் உட்பட சகல வசதிகளையும் உள்ளடக்கிய இக்கிராமம் அமைக்கப்பட்டு 'சதாம் ஹூஸைன்' கிராமம் என்ற பெயரில் 1982ஆம் ஆண்டு ஜூலை 25ஆம் திகதி பொதுமக்களிடம் கையளிக்கப்பட்டது.

எனினும் குறித்த கிராமத்தின் பெயரை மாற்றினால் மாத்திரமே தற்போதைய ஈராக் அரசாங்கம் உதவி புரியும் என கொழும்பிலுள்ள ஈராக் தூதுவராலயம் அறிவித்துள்ளமை குறிப்பிடத்தக்கது.