சத்தியமூர்த்தி பவனில் கிறிஸ்மஸ் விழா

தமிழக காங்கிரஸ் கட்சி சார்பில் சனிக்கிழமை சத்தியமூர்த்தி பவனில் கிறிஸ்மஸ் விழா சிறப்பாக கொண்டாடப்பட்டது. காங்கிரஸ் தலைவர் ஞானதேசிகள் எம்.பி. தலைமையில் நடைபெற்ற விழாவில் மத்திய மந்திரிகள் ஜி.கே. வாசன், ஜெயந்தி நடராஜன், முன்னாள் மத்திய மந்திரிகள் ஈ.வி.கே. எஸ். இளங்கோவன், திருநாவுக்கரசர், முன்னாள் எம்.எல். ஏ. பீட்டர் அல்போன்ஸ் ஆகியோர் பங்கேற்று கேக் வெட்டி தொண்டர்களுக்கு வழங்கினார்கள்.

பின்னர் அங்கு ஏழைகளுக்கு நலத்திட்ட உதவிகள் வழங்கப்பட்டன. வேட்டி- சேலை, பள்ளி குழந்தைகளுக்கு சீருடை, நோயாளிகளுக்கு போர்வைகளை மத்திய மந்திரிகள் ஜி.கே. வாசன் மற்றும் ஜெயந்தி நடராஜன் வழங்கினர்.

பின்னர் மத்திய மந்திரி ஜி.கே. வாசன் நிருபர்களுக்கு பேட்டி அளித்தார். அப்போது அவர் கூறியதாவது,

முல்லைப் பெரியாறு அணை பிரச்சினையை பொறுத்தவரை தமிழக அரசியல் கட்சிகள் ஒருமித்த கருத்துடன் ஒன்றாக உள்ளன. வருகிற பெப்ரவரி மாதம் இதற்காக நியமிக்கப்பட்ட குழுவின் அறிக்கை தாக்கல் செய்யப்பட உள்ளது. அது வரை இரு மாநில மக்களும் அமைதி காக்க வேண்டும். இதில் வன்முறை தேவைற்றது.

பிரதமர் மன்மோகன்சிங், காங்கிரஸ் தலைவர் சோனியா காந்தி ஆகியோர் முல்லைப் பெரியாறு அணை பிரச்சினையில் நடநிலையோடு உள்ளனர். இதில் நாம் இரு மாநில ஒற்றுமையை கவனிக்க வேண்டும். இந்த விஷயத்தில் சென்னை வரும் பிரதமருக்கு கறுப்பு கொடி காட்டப் போவதாக சிலர் அறிவித்துள்ளனர். இது தேவையற்ற ஒன்றாகும்.

இவ்வாறு ஜி. ஜே. வாசன் கூறினார்.