ராஜ்யசபாவில் இன்று விவாதம்; தோல்வியடையும் சாத்தியம்

லோக்சபாவில் தட்டுத்தடுமாறி லோக்பால் மசோதாவை நிறைவேற்றிய மத்திய அரசுக்கு ராஜ்யசபாவில் பெரும் நெருக்கடி நிலைமையில் உள்ளது.

லோக்சபாவில் இந்த சட்டமூலம் மீது நடந்த வாக்கெடுப்பில் கலந்து கொள்ளாமல் முலாயம் சிங் யாதவின் சமாஜ்வாடி கட்சி மாயாவதியின் பகுஜன் சமாஜ் ஆகிய 2 கட்சிகளின் எம்.பிக்களும் வெளிநடப்பு செய்து மத்திய அரசுக்கு மறைமுகமாக உதவியதால் இந்த சட்ட மூலம் நிறைவேறியது.

இவர்கள் எதிர்த்து வாக்களித்திருந்தால் மசோதா தோற்றிருக்கும்.

அதேபோல ராஜ்யசபாவில் காங்கிரஸ் கூட்டணிக்கு பெரும்பான்மையே இல்லை. 245 பேர் கொண்ட இந்த அவையில் காங்கிரஸ் தி.மு.க. மம்தாவின் திரிணாமுல் காங்கிரஸ், சரத்பவாரின் தேசியவாத காங்கிரஸ், அஜீத் சிங்கின் ராஷ்ட்ரீய லோக் தள் ஆகிய கட்சிகளுக்கும், வெளியில் இருந்து மத்திய அரசை ஆதரிக்கும் ராம்விலாஸ் பாஸ்வானின் லோக் ஜன் சக்தி ஆகிய கட்சிகள் அனைத்தையும் சேர்த்தாலும் மொத்தமே 93 எம்.பிக்கள் தான் உள்ளனர்.

இதனால் ராஜ்யசபாவிலும் இந்த மசோதாவை நிறைவேற்ற சமாஜ்வாடி கட்சி (5 எம்.பிக்கள்) பகுஜன் சமாஜ் (18 எம்.பிக்கள்), லாலுவின் ராஷ்ட்ரீய ஜனதா தளம் (4 எம்.பிக்கள்) ஆகிய கட்சிகளையே மலைபோல நம்பியுள்ளது மத்திய அரசு. இந்த மூன்று கட்சிகளுக்கும் சேர்த்து 27 எம்.பிக்கள் உள்ளனர்.

காங்கிரஸ் கூட்டணியின் 93 எம்.பிக்களோடு இந்த 27 எம்.பிக்களைச் சேர்த்தால் ராஜ்யசபாவில் உள்ள மொத்த எம்.பிக்களில் கிட்டத்தட்ட 50 சதவீத ஆதரவைத் திரட்டிவிட முடியும்.

ஆனால் லோக்சபாவில் செய்ததைத் போல ராஜ்யசபாவிலும் இந்தக் கட்சிகள் வெளிநடப்பு செய்து விட்டால் சட்டமூலத்தை வெல்வது சந்தேகமே. அதேபோல இந்தக் கட்சிகள் பாஜக இடதுசாரிகளுடன் கைகோர்த்துவிட்டால் மசோதா நிச்சயமாக தோல்வியடையும்.

இதையடுத்து முலாயம், லாலு, மாயாவதி ஆகியோருடன் மறைமுகமான பேச்சுவார்த்தையை காங்கிரஸ் கட்சித் தலைவர்கள் தொடங்கியுள்ளனர். பேச்சு வார்த்தைகள் நீடிப்பால் சட்டமூலத்தை நேற்று இல்லாமல் இன்று ராஜ்யசபாவில் தாக்கல் செய்ய மத்திய அரசு திட்டமிட் டுள்ளது. இந்நிலையில் ராஜ்யசபாவில் மசோதாவை தாக்கல் செய்யுமுன் அதற்கு ஜனாதிபதியின் ஒப்புதல் பெறப்பட வேண்டும் என்பதால் அது குடியரசுத் தலைவர் பிரதீபா பட்டீலுக்கு அனுப்பி வைக்கப்பட்டுள்ளது.