லோக்பால் மசோதாவுக்கு எதிர்க்கட்சிகள் கடும் எதிர்ப்பு: மாநிலங்களவையில் அமளி

லோக்பால் மசோதாவுக்கு எதிர்க்கட்சிகள் கடும் எதிர்ப்பு: மாநிலங்களவையில் அமளி
மாநிலங்களவையில் நேற்று முன்தினம் தாக்கல் செய்யப்பட்ட லோக்பால் மசோதாவுக்கு எதிர்க்கட்சிகள் கடும் எதிர்ப்பு தெரிவித்தன. ‘மாநிலங்களின் உரிமைகளை பரித்தால் அரசியல் சட்டத்துக்கே ஆபத்து ஏற்படும்’ என எதிர்க்கட்சி தலைவர் அருண் ஜெட்லி எச்சரித்தார். ஊழலை ஒழிப்பதற்கான லோக்பால் மசோதா, மக்களவையில் கடந்த செவ்வாய்க்கிழமை நிறைவேற்றப்பட்டது. இதை மாநிலங்களவையில் நாடாளுமன்ற விவகார இணையமைச்சர் நாராயணசாமி நேற்று முன்தினம் தாக்கல் செய்தார். ‘மசோதா நிறைவேற உறுப்பினர் ஒத்துழைக்க வேண்டும்’ என்று அவர் கோரினார். மசோதா மீது விவாதத்தை தொடக்கி வைத்து பாஜ மூத்த தலைவரும், எதிர்க்கட்சி தலைவருமான அருண் ஜெட்லி பேசியதாவது,

மத்திய அரசு தாக்கல் செய்துள்ள லோக்பால் மசோதா ஊழலை ஒழிக்கும் வகையில் வலுவானதாக இல்லை. சி.பி.ஐ. இன்னும் மத்திய அரசின் கட்டுப்பாட்டிலேயே உள்ளது. தனியார் தொண்டு அமைப்புகள் லோக்பால் வரம்புக்குள் கொண்டு வரப்பட்டு இருப்பது மூலம், பழிவாங்கும் நடவடிக்கைகள் வரும் அபாயம் உள்ளது மேலும் 9 உறுப்பினர்களை கொண்ட லோக்பால் அமைப்பில் குறைந்தது 50 இடங்கள் சிறுபான்மையினருக்கு ஒதுக்கப்படும் என்று மசோதாவில் கூறப்பட்டுள்ளது இது அரசியல் சாசனத்துக்கு எதிரானது மத அடிப்படையில் இட ஒதுக்கீடு அளிக்க முடியாது. இதை எதிர்த்து யாராவது நீதிமன்றம் சென்றால் அது செல்லாததாகிவிடும்.

லோக்பால் அமைப்பு போன்று மாநிலங்களில் ஊழல் புகார்களை விசாரிக்க வகை செய்யும் லோக் அயுக்தா அமைப்பை ஏற்படுத்துவது மசோதாவில் கட்டாயமாக்கப்பட்டு உள்ளது. லோக் அயுக்தா அமைப்பின் நியமனங்களும் மத்திய அரசின் கட்டுப்பாட்டிலேயே உள்ளன. இது மாநிலங்களின் உரிமையை பறிக்கும் செயல். மாநிலங்களின் உரிமை பறிக்கப்படுவதை மத்திய அரசு ஊக்குவித்தால் அரசியல் சட்டத்துக்கே ஆபத்து ஏற்படும். இவ்வாறு அருண் ஜெட்லி பேசினார்.

பகுஜன் சமாஜ் உறுப்பினர் எஸ்.சி. மிஸ்ரா பேசுகையில், “லோக் அயுக்தா அமைப்பை கட்டாயப்படுத்துவதன் மூலம் மாநிலங்களின் உரிமையில் மத்திய அரசு தலையிடுகிறது. சிறுபான்மை மக்களை காங்கிரஸ் வெறும் ஓட்டு வங்கி இயந்திரமாக பயன்படுத்துகிறது என்றார். மன்மோகன் & சோனியா ஆலோசனை முன்னதாக காங்கிரஸ் உயர் நிலை குழு கூடி ஆலாசனை நடத்தியது. இதில் பிரதமர் மன்மோகன், சோனியா காந்தி, மத்திய அமைச்சர்கள் பிரணாப் முகர்ஜி, சிதம்பரம், ஏ.கே. அந்தோணி, பி.கே. பன்சால், கபில் சிபல் ஆகியோர் கலந்து கொண்டனர். மாநிலங்களவையில் மசோதா நிறைவேறாவிட்டால், நாடாளுமன்ற கூட்டுக் கூட்டத்தை கூட்டுவது உட்பட எடுக்க வேண்டிய நடவடிக்கைகள் குறித்து கூட்டத்தில் ஆலோசிக்கப்பட்டதாக காங்கிரஸ் வட்டாரங்கள் தெரிவித்தன.

திரிணாமுல் பிடிவாதம் நாடாளுமன்ற கூட்டம் தொடங்கும் முன்பாக திரிணாமுல் காங்கிரஸ் மூத்த தலைவரும் மத்திய கப்பல்துறை இணை அமைச்சருமான முகுல் ராய் கூறுகையில், “லோக் அயுக்தா அமைப்பை கட்டாயமாக்குவது மாநிலங்களின் உரிமையில் தலையிடுவதாகும். லோக்பால் மசோதாவில் இருந்து இந்த பிரிவை நீக்க வேண்டும் என்பதில் உறுதியாக இருக்கிறோம். பிரச்சினைக்கு தீர்வு காண நிதியமைச்சர் பிரணாப் முகர்ஜியுடன் பேசி வருகிறோம் என்றார்.

பிரதமர் வராததால் அமளி

லோக்பால் மசோதாவை மாநிலங்களவையில் அமைச்சர் நாராயணசாமி தாக்கல் செய்த போது பிரதமர் மன்மோகன் சிங் அவையில் இல்லை. பிரதமர் எங்கே? என்று கேள்வி எழுப்பிய பாஜ எம்.பிக்கள் அமளியில் ஈடுபட்டனர்.

‘பிரதமர் வருவார்’ என்று அவைத் தலைவர் அன்சாரி உறுதி அளித்த போது அமளி தொடர்ந்ததால் 10 நிமிடங்கள் அவை ஒத்திவைக்கப்பட்டது. மீண்டும் அவை கூடிய போது பிரதமர் அவைக்கு வந்ததால் சகஜநிலை திரும்பி மசோதா மீது விவாதம் தொடங்கியது.