மாநில அதிகாரங்களில் காங்கிரஸ், பா.ஜ அணுகுமுறையில் மாற்றம் வருமா?

மாநில அதிகாரங்களில் காங்கிரஸ், பா.ஜ அணுகுமுறையில் மாற்றம் வருமா?
ஊழலைக் களையும் லோக்பால் மசோதா, வெறும் அலங்கார வார்த்தை ஜாலங்களுடன் முடிந்து விட்டது என்றே கருதலாம். ஆளும் காங்கிரஸ் தலைமையிலான கூட்டணி அரசுக்கு ஆதரவு தரும், திரிணமுல் கட்சி, மாநில ஆட்சியின் தனித்துவத்திற்கு அபா யம் தரும். லோக்பால் மசோதா என்று கருதுகிறது. இது ஆராயத்தக்க வாதம் ஆகும்.

இந்தியா என்பது வலுவான மத்திய அரசுடன் உள்ள அமைப்பு என்பதை இதுவரை கடந்த 60 ஆண்டுகளில் பல்வேறு சோதனைகள் வந்தபோது நிரூபிக்கப்பட்டிருக்கிறது. இராணுவம், நீதித்துறை அதிகார வர்க்கம் ஆகிய ஒவ்வொன்றும், அதன் வரம்புகளை மீறியதாக, அல்லது முரண்பட்டு ஆட்சியை எதிர்த்ததாக சம்பவங்கள் இல்லை. பார்லிமென்ட் எப்போதும் உயர் நிலையில் இருந்திருக்கிறது.

என்றாலும், அதை தலைமை வகித்து நிர்வகிக்கும் முக்கிய கட்சிக்கு, இப்போது வந்த பிரச்சினையே, லோக்பால் மசோதா நிறைவேறாமல் நின்றதின் அடையாளம் லோக்சபாவில், இம்மசோதாவுக்கு அரசியல் சட்ட அமைப்பு அந்தஸ்து தரும் அம்சம் நிறை வேறவில்லை. ராஜ்யசபாவில், ஆளும் கூட்டணிக்கு பெரும்பான்மை இல்லாததால், எதிர்க்கட்சிகள் நினைத்த ஒரு சில திருத்தங்களும் நிறைவேறவில்லை.

அதே சமயம் மாநில உரிமைகளில் தலையிடும் விஷயங்களை அங்கீகரிக்க முடியாது என்ற திரிணமுல் காங்கிரஸ் நிலைப்பாடு வெற்றிபெற்றிருக்கிறது. இந்த அம்சம், இப்போது முக்கியமாக ஆராயப்பட வேண்டிய அம்சம். கடந்த 60 ஆண்டுகளில், நாட்டில் 40 ஆண்டுகளாக, காங்கிரஸ் தலைமையிலான ஆட்சி தான் நடந்தி ருக்கிறது.

காங்கிரஸ் தவிர வேறு ஆட்சி மத்தியில் வராது என்பதை, முதன் முதலாக வாஜ்பாய் தலைமையிலான தேசிய ஜனநாயக கூட்டணி ஆட்சி உரு வாகி நிரூபித்தது. அதற்குப் பின் மத்தியில் கூட்டணி ஆட்சி என்பது முடிவு செய்யப்பட்ட ஒன்று என்பது அரசியலில் ஏற்கப்பட்ட அம்சமாகிவிட்டது. வாஜ்பாயும், கூட்டணிக் கட்சி முரண்பாடுகளை குறைப்பதில் ஓரளவு வெற்றிகண்டார்.

உ. பி. யில் மோதல், இப்போது நாடு ஐந்து மாநிலத் தேர்தலுக்கு தயாராகி வருகிறது அதுவும் உ.பி. சமாஜ்வாடி கட்சியின் எதிர் காலத்தை நிர்ணயிக்கும் முதல்வர் மாயாவதி தலைமையிலான பகுஜன் சமாஜ் கட்சி எண்ணிக்கை சற்று குறைந்தாலும் ஆட்சியை மீண்டும் பிடித்தால் ஆச்சரியப்படுவதற்கு இல்லை. காங்கிரஸ் பொதுச் செயலர் ராகுல் உத்தியால், ஒருக்கால் காங்கிரஸ் கட்சி கணிசமான இடங்களைப் பிடித்து அங்கு கூட்டணி ஆட்சி அமைக்கும் வாய்ப்பு ஏற்பட்டால், அதற்குப் பின் மத்திய அரசின் போக்கே மாறிவிடும்.

ஏற்கனவே ஏழு மாநிலங்களில் ஆட்சியை வைத்திருக்கும் பா.ஜ, இம்மாநிலத்தில் காலூன்றி வளம் பெறுமா என்பது தேர்தலுக்குப் பின் தெரியும். காரணம் பா.ஜ.வில் இம்மாநிலத்தில் தேர்தல் வெற்றியை ஈட்டித் தர யார் முக்கியத் தலைவர், என்ன அம்சம் என்பது இன்னமும் தெளிவு பெறாமல் இருக்கிறது. எதிர்க்கட்சியாக இருப்பதால், புதிய சூழ்நிலைகளில் மாநிலங்களுக்கும், மத்திய அரசுக்கும் அடிக்கடி எப்படி முரண்பாடுகள் ஏற்படுகின்றன என்பதை பா. ஜ. உணரத் துவங்கியிருக்கிறது. அது லோக்பால் விவாதத்தில் அக்கட்சி பிரதிபலித்திருக்கிறது.

இன்னமும், பண்டித நேரு, முதல் இந்திரா வரையில் உள்ள ஆட்சியைப் போல, மத்திய அரசு எது சொன்னாலும், மாநில அரசுகள் தலையை ஆட்ட வேண்டும் என்ற கருத்து எடுபடுவது இனி சிரமம். தவிரவும் மம்தா, மோடி, ஜெயலலிதா, மாயாவதி, நிதிஷ்குமார் போன்ற வலுவான மாநில முதல்வர்கள் உருவாகியிருக்கும்போது, காங்கிரஸ் கட்சியும் சரி, பா. ஜ. வும் மாநில அளவில் வலுவான வளம் சேர்க்கும் தலைவர்களை முன்னிலைப்படுத்தாமல் தயக்கம் காட்டுகின்றன.

ஆகவே, வலுவான லோக்பால் உருவாகும் முன், ஊழலை முறையாகக் குறைக்க நடைமுறை காணும் முன், இந்த இரு தேசிய கட்சிகளும் மாநிலங்களைப் பொறுத்தவரை தங்கள் அணுகுமுறை என்ன? அவற்றை எப்படி மத்திய அரசுடன் இணக்கமாகக் கொண்டு செல்வது என்ற கருத்தை தெளிவுபடுத்தும் காலகட்டம் வந்து விட்டது. அதற்கு முடிவு காண முடியாமல், பட்ஜெட் கூட்டத் தொடரில் லோக்பால் மசோதா நிறைவேறும் என்ற நம்பிக்கைக்கு எது அடிப்படை என்றே தெரியவில்லை.