பரிசு சீட்டில் இலக்கங்களை மாற்றி பரிசு பெற முயற்சி

by *சம்ஸ் Wed 18 Jan 2012 - 6:35

பரிசு சீட்டில் இலக்கங்களை மாற்றி பரிசு பெற முயற்சி
லக்ஷ்மி பரசுராமன்
தேசிய லொத்தர் சபையின் மஹஜன சம்பத்த அதிஷ்ட சீட்டின் இறுதி மூன்று இலக்கங் களையும் மாற்றி யமைத்து பரிசினை தட்டிச் செல்ல முயன்ற நபரொருவரை பொலிஸ் குற்றப்புலனாய்வு பிரிவினர் கைதுசெய்துள்ளனர்.

மாலபேயைச் சேர்ந்த சந்தேக நபரே பணப்பரிசிலை பெற்றுக்கொள்வதற்காக லொத்தர் சீட்டின் இறுதி மூன்று இலக்கங்களையும் கணனியின் உதவியுடன் மாற்றியமைத்துள்ளார்.

இங்கிரிய பொலிஸ் பிரிவிற்குட்பட்ட பகுதியில் வைத்து போலி லொத்தர் சீட்டினை சமர்ப்பித்து தனது பரிசிலை பெற்றுக்கொள்ள இந்நபர் முயற்சித்த போதே இங்கிரிய பொலிஸ் குற்றப்புலனாய்வு பிரிவின் அதிகாரிகள் குறித்த நபரை பின்தொடர்ந்து சென்று மடக்கிப் பிடித்து கைதுசெய்திருப்பதாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் அஜித் ரோஹன தெரிவித்தார்.

இதேவேளை குறித்த லொத்தர் சீடடினை மாற்றியமைக்க பயன்படுத்திய கணனி மற்றும் மேலும் பல உபகரணங்களையும் பொலிஸ் குற்றப்புலனாய்வு அதிகாரிகள் கைப்பற்றியுள்ளனர். இதேபோன்று வேறு போலி லொத்தர் சீட்டுக்கள் மூன்று குறித்த இடத்திலிருந்து கிடைக்கப் பெற்றிருப்பதாகவும் பொலிஸ் பேச்சாளர் கூறினார்.

சந்தேக நபர் ஹொரணை மஜிஸ்திரேட்டில் நேற்றைய தினமே ஆஜர்படுத்தப்பட்டார். இங்கிரிய பொலிஸார் மேலதிக விசாரணைகளை முன்னெடுத்து வருகின்றனர்.