பலஸ்தீனின் முன்னணி ஹமாஸ் உறுப்பினர் இஸ்ரேல் கைது

பலஸ்தீனின் முன்னணி ஹமாஸ் உறுப்பினர் இஸ்ரேல் கைது
பலஸ்தீனின் முன்னணி அரசியல்வாதியும் ஹமாஸ் அமைப்பின் இராணுவ பிரிவு உறுப்பினருமான அஸிஸ் ட்வைக் மேற்குக் கரையில் வைத்து இஸ்ரேல் இராணுவத்தினரால் கைது செய்யப்பட்டுள்ளார்.

பலஸ்தீன் சட்டமன்ற உறுப்பினரான ட்வைக் இராணுவ சோதனைச் சாவடியில் வைத்து கைது செய்யப் பட்டதாக இஸ்ரேல் இராணுவம் குறிப்பிட்டுள்ளது. ரமல்லா மற்றும் ஜரூசலத்திற்கு இடையிலுள்ள சபா பகுதியில் காரில் பயணித்துக் கொண்டிருக்கும்போதே இவர் கைதாகியுள்ளார்.

தீவிரவாத செயற்பாடுகளில் ஈடுபட்டதால் அஸிஸ் ட்வைக் கைதுசெய்யப்பட்டதாக இஸ்ரேல் இராணுவ தரப்பில் கூறப்பட்டுள்ளது. இந்த சம்பவத்தில் நேரில் கண்ட பலஸ்தீனியர் ஒருவர் மான் செய்திச் சேவைக்கு கூறும்போது ட்வைக்கின் கையில் விலங்கிடப்பட்டு கண்கள், கட்டப்பட்ட நிலையில் இஸ்ரேல் இராணுவம் கைதுசெய்து அழைத்துச் சென்றனர் என்றார்.

ட்வைக் பலஸ்தீனின் காஸா பகுதியை ஆளும் ஹமாஸ் அமைப்பு உறுப்பினராவார். எனினும் அவர் மேற்குக் கரையில் இருந்தே செயற்பட்டு வரகிறார் என்பது குறிப்பிடத்தக்கது.

இந்த கைதைத் தொடர்ந்து இஸ்ரேல், காஸா எல்லை பகுதியில் பெரும் பரபரப்பு ஏற்பட்டது. இஸ்ரேல் விமானங்கள் நேற்று முன்தினம் காஸா இலக்குகள் மீது தாக்குதல் நடத்தியமை குறிப்பிடத்தக்கது. பலஸ்தீன சட்டமன்ற உறுப்பினர்கள் 132 உறுப்பினர்களில் 74 பேரை இஸ்ரேல் இராணுவம் கைது செய்துள்ளனர். இதில் இருபது பேர் ஹமாஸ் உறுப்பினர்கள் என்பது குறிப்பிடத்தக்கது. எனினும் கடந்த 2007 ஆம் ஆண்டு காஸா பகுதியை ஹமாஸ் அமைப்பு கட்டுப்பாட்டில் கொண்டுவந்ததன் பின் பலஸ்தீன சட்டமன்றம் இதுவரை கூடவில்லை.