தமிழக அமைச்சர் கொலை வழக்கில் ராமதாசின் தம்பி கைது

by *சம்ஸ் Fri 27 Jan 2012 - 9:40

தமிழக அமைச்சர் கொலை வழக்கில் ராமதாசின் தம்பி கைது
தமிழக அமைச்சர் சண்முகம் உறவினர் கொலை வழக்கில், பா.ம.க. நிறுவனர் ராமதாசின் தம்பி உட்பட இருவர் கைது செய்யப்பட்டனர். ஆறு ஆண்டுகளுக்கு முன் நடந்த சம்பவத்தில் இதுவரை அமைதியாக இருந்த சி.பி.ஐ. இப்போது திடீரென சுறுசுறுப்பாகியுள்ளது. திண்டி வனத்தில் அமைச்சர் சண்முகம் வீட்டில், 2006 ஆம் ஆண்டு சட்டசபை தேர்தல் வாக்குப் பதிவு அன்று பா.ம.க.வினர் புகுந்து அங்கிருந்தவர்களை தாக்கினர்.

இதில் அமைச்சரின் உறவினர் முருகானந்தம் கொலை செய்யப்பட்டார். இது தொடர்பாக பா.ம.க. நிறுவனர் ராமதாஸ், அவரது மகன் அன்புமணி மற்றும் பலர் மீது சண்முகம் திண்டிவனம் பொலிஸில் புகார் செய்தார்.

பொலிஸார் ராமதாஸ், அன்புமணி ஆகியோர் பெயரை விட்டு விட்டு மற்றவர்கள் மீது வழக்கு பதிவு செய்து 11 பேரை கைது செய்தனர். பா.ம.க. நிறுவனர் ராமதாஸ், அவரது மகன் அன்புமணி ஆகியோர் பெயர் சேக்கப்படாததற்கு எதிர்ப்பு தெரிவித்த சண்முகம், சி.பி.ஐ. விசாரணை கோரி சென்னை மேல் நீதிமன்றில் வழக்கு தொடர்ந்தார். வழக்கை விசாரித்த நீதிமன்றம் சி.பி.ஐ. விசாரணைக்கு உத்தரவிட்டது. அதன்படி சி.பி.ஐ. பொலிஸார் விசாரித்து வருகின்றனர்.

கடந்த 5ம் திகதி முருகானந்தம் கொலை வழக்கு தொடர்பாக 8 பேரை சி.பி.ஐ. பொலிஸார் கைது செய்தனர். பின் அவர்களை காவலில் எடுத்து விசாரித்தனர். நேற்று முன்தினம் திண்டிவனத்தில் பா.ம.க. நிறுவனர் ராமதாசின் தம்பி சீனுவாச கெளண்டர் (65), அவரது ஆதரவாளரான விழுப்புரத்தைச் சேர்ந்த கருணாநிதி (50) ஆகியோரை கைது செய்தனர்.

இருவரும் நேற்று முன்தினம் மாலை செங்கல்பட்டு தலைமை குற்றவியல் நீதிமன்றத்தில் ஆஜர்படுத்தப்பட்டனர்.

அவர்களை 15 நாள் நீதிமன்ற காவலில் வைக்கும்படி நீதிபதி ஆனந்தி உத்தரவிட்டார். "உடல் நிலை சரியில்லாததால் தங்களை மருத்துவமனையில் அனுமதிக்க வேண்டும்" என இருவரும் நீதிபதியிடம் தெரிவித்தனர். "சிறை கண்காணிப்பாளரிடம் தகவல் தெரிவியுங்கள். அவர் மருத்துவ சிகிச்சைக்கு ஏற்பாடு செய்வார்" என நீதிபதி தெரிவித்தார்.

அதைத் தொடர்ந்து இருவரும் தங்களை கடலூர் சிறையில் அடைக்கும்படி கோரினர். இவ்வழக்கில் கைது செய்யப்பட்டவர்கள் அனைவரும் சென்னை புழல் சிறையில் உள்ளதால் அங்கு தான் செல்ல வேண்டும் என நீதிபதி கூறினார். ராமதாஸ் தம்பி சீனுவாச கெளண்டர், சமீபத்தில் தான் காங்கிரஸ் கட்சியில் இணைந்தார். அவரது கைது பா.ம.க வட்டாரத்தில் கலக்கத்தை ஏற்படுத்தியுள்ளது.

இவ்வழக்கு தொடர்பாக பா.ம.க. நிறுவனர் ராமாதாஸ், அவரது மகனும் முன்னாள் மத்திய அமைச்சருமான அன்புமணியிடமும் சி.பி.ஐ. அதிகாரிகள் விசாரணை நடத்தக்கூடும் என்ற தகவல் வெளியாகியுள்ளது.