மதுரை விமான நிலையத்தில் மு.க.ஸ்டாலின்-விஜயகாந்த் திடீர் சந்திப்பு:

by **முனாஸ் சுலைமான்** Mon 13 Feb 2012 - 12:41

தி.மு.க. பொருளாளரும், முன்னாள் துணை முதல்வருமான மு.க.ஸ்டாலின் விருதுநகரில் நேற்று மாலை நடந்த தி.மு.க. இளைஞரணி நிர்வாகிகள் தேர்வு நேர்காணல் கூட்டத்தில் கலந்து கொண்டார். பின்னர் சென்னை செல்வதற்காக நேற்று இரவு மதுரை விமான நிலையத்திற்கு வந்தார். விமானம் புறப்பட தாமதம் ஏற்பட்டதால் விமான நிலையத்தில் உள்ள முக்கிய பிரமுகர்கள் தங்கும் இடத்தில் அமர்ந்திருந்தார்.

அப்போது அருப்புக் கோட்டையில் நடந்த திருமண விழாவில் கலந்து கொண்ட தே.மு.தி.க. தலைவர் விஜயகாந்த்தும் அதே விமானத்தில் சென்னை செல்வதற்காக மதுரை விமான நிலையத்திற்கு வந்தார். அவர் கட்சி பிரமுகர்களிடம் பேசிக் கொண்டு இருந்தபோது அங்கு வந்த முன்னாள் அமைச்சர் தங்கம்தென்னரசு எம்.எல்.ஏ., விஜயகாந்த்துக்கு வணக்கம் தெரிவித்தார். அப்போது தங்கம்தென்னரசு விஜயகாந்திடம், மு.க.ஸ்டாலின் முக்கிய பிரமுகர்களுக்கான அறையில் இருப்பதாக தெரிவித்தார்.

இதனை கேட்ட விஜயகாந்த் உடனடியாக மு.க. ஸ்டாலின் அமர்ந்திருந்த இடத்துக்கு சென்றார். இருவரும் கை குலுக்கி கொண்டனர். அப்போது சட்டசபையில் இருந்து தான் சஸ்பெண்ட் செய்யப்பட்ட போது அதற்கு கண்டனம் தெரிவித்து தி.மு.க. வெளிநடப்பு செய்ததற்கு விஜயகாந்த் நன்றி தெரிவித்தார். சுமார் 30 நிமிடம் இருவரும் தனியாக பேசி கொண்டிருந்தனர்.

தற்போதைய அரசியல் நிலவரம் குறித்து மு.க.ஸ்டாலினும், விஜயகாந்த்தும் பேசி கொண்டதாக தெரிகிறது. பின்னர் இருவரும் ஒரே விமானத்தில் சென்னை புறப்பட்டனர். விமானம் புறப்பட தயாரானபோது மத்திய மந்திரி ப.சிதம்பரத்தின் மகன் கார்த்தி சிதம்பரமும் வந்தார். அவரும் அதே விமானத்தில் சென்னை புறப்பட்டு சென்றார்.

விமான நிலையத்தில் மு.க.ஸ்டாலின்- விஜயகாந்தின் 1/2 மணி நேர சந்திப்பு அரசியல் மாற்றத்தை ஏற்படுத்த வாய்ப்பு இருப்பதாக தி.மு.க., தே.மு.தி.க. நிர்வாகிகள் மத்தியில் பரவலாக பேசப்படுகிறது. ஒரே விமானத்தில் மு.க.ஸ்டாலின், விஜயகாந்த், கார்த்தி சிதம்பரம் ஆகியோர் சென்றதால் அவர்களை வழியனுப்ப சென்ற தி.மு.க., தே.மு.தி.க., காங்கிரஸ் கட்சி நிர்வாகிகள் விமான நிலையத்தில் இருந்து ஒன்றாக வெளியே வந்தனர்.