பில்லி சூனியம் வைத்ததாக நம்பி தம்பதியின் பற்களை பிடுங்கிய கிராம மக்கள்

ஆந்திர மாநிலம் குண்டூர் மாவட்டம் துரக்கபாளையத்தை சேர்ந்தவர் ஷேக்பாபு. இவரது மனைவி அல்லாபி. இருவரும் மந்திரவாதிகள். இவர்கள் பில்லி சூனியம் வைப்பதற்கு ஆயிரக்கணக்கில் வசூலித்து வந்தனர். சுற்றுப்பகுதி மக்கள் பலர் அவர்களது எதிரிகளுக்கு பில்லி சூனியம் வைக்க இந்த தம்பதியிடம் வருவதுண்டு.

இதனால் அவர்களது வீட்டில் எப்போதும் ஒரு கூட்டம் காத்திருக்கும். ஷேக்பாபு-அல்லாபி இருவரும் இரவு நேரங்களில் அங்குள்ள சுடுகாட்டுக்கு சென்று மண்டை ஓடுகளை சேகரித்து வருவார்கள். இதனால் அவர்களை பார்த்து கிராமமே அஞ்சி நடுங்கியது. இந்த தம்பதிகள் எதிரில் வந்தால் பயத்தில் ஓடி ஒளிந்து கொள்வார்கள். இந்நிலையில் கடந்த ஒரு வாரத்தில் மட்டும் துரக்க பலீளையத்தில் 10 பேர் திடீரென ஒன்றன் பின் ஒன்றாக பல்வேறு காரணங்களால் இறந்து போனார்கள்.

10 பேரின் திடீர் மரணத்திற்கு மந்திரவாதி தம்பதிதான் காரணம் என்று கிராம மக்கள் வெகுண்டெழுந்தார்கள். பின்னர் அவர்கள் கும்பலாக சென்று ஷேக்பாபு வீட்டை முற்றுகையிட்டனர். அப்போது உள்ளே இருந்த அவர் ”நீங்கள் அனைவரும் இங்கிருந்து செல்லாவிட்டால் உங்கள் அனைவருக்கும் சூனியம் வைத்து கொன்றுவிடுவேன்” என்று மிரட்டினார். இதனால் ஆவேசம் அடைந்த கிராம மக்கள் ஷேக்பாபு- அல்லாபி இருவரையும் குண்டுக்கட்டாக தூக்கிச்சென்று மரத்தில் கட்டி வைத்தனர்.

பின்னர் அவர்கள் ”கட்டிங் பிளேயரை” எடுத்து வந்து அவர்களது பற்கள் அனைத்தையும் பிடுங்கி எறிந்தனர். இதனால் அவர்கள் வாயில் இருந்து ரத்தம் கொட்டியது. வலியால் அலறித்துடித்தனர். பற்களை பிடுங்கியதும் கிராம மக்கள இருவரது கட்டுக்களையும் அவிழ்த்து தெருவில் கிடத்தி விட்டு ஓட்டம் பிடித்தனர்.

இதுபற்றி துரக்கபாளையம் போலீசார் வழக்குப்பதிவு செய்து தப்பி ஓடிய கிராம மக்களை தேடிவருகிறார்கள். பல் பிடுங்கபபட்ட மந்திரவாதிகளை போலீசார் மலச்சாவரம் மருத்துவமனையில் சேர்த்தனர். அங்கு அவர்களுக்கு சிகிச்சை அளிக்கப்பட்டு வருகிறது. துரக்கபாளையத்தை சேர்ந்த கிருஷ்ணா கூறும்போது, ”மந்திரவாதிகளின் பற்கள் முழுவதையும் பிடுங்கிவிட்டோம். இனி அவர்கள் சொல்லும் மந்திரம் எதுவும் பலிக்காது” என்றார்.