எஸ். எஸ். எல்சி தேர்வு முடிவுகள் இன்று பிற்பகல் வெளியாகிறது!

une 4th, 2012 அன்று பிரசுரிக்கப்பட்டது.


10ம் வகுப்பு பொதுத்தேர்வு முடிவுகள் இன்று மதியம் 1:30 மணி அளவில் வெளியாகிறது.

தமிழ் நாடு மற்றும் புதுச்சேரியில் கடந்த ஏப்ரல் மாதம் 4ம் தேதி தொடங்கி 23ம் திகதி வரை பத்தாம் வகுப்பு தேர்வுகள் வெற்றிகரமாக நடைபெற்று முடிந்தது. இத் தேர்வில் இரண்டு மாநிலங்களிலும் 11.68 லட்சம் மாணவ மாண்விகள் எழுதினர்.

இதைத்தொடர்ந்து விடைத்தள்களை சரிபார்க்கும் பணி நடைபெற்று வந்தது. அதன் முடிவுகள் இன்று பிற்பகல் வெளியிட உள்ளதாக பள்ளிக் கல்வித்துறை அறிவித்துள்ளது.

சமச்சீர் பாடத்திட்டத்தின் கீழ் முதன்முறையாக நடைபெற்ற பத்தாம் வகுப்பு தேர்வுகள் இவை என்பது குறிப்பிடத்தக்கது. மதிப்பெண் சான்றிதழ் அந்தந்த பள்ளி தலைமையாசிரியர்கள் மூலம் ஜூன் 21ம் தேதி வழங்கப்படும். தனித்தேர்வர்கள் தாங்கள் தேர்வு எழுதிய மையங்களில் இருந்து மதிப்பெண் சான்றிதழைப் பெற்றுக்கொள்ளலாம்.

அனைத்துப் பாடங்களுக்குமான மறுகூட்டல் விண்ணப்பங்கள் செவ்வாய்க்கிழமை (ஜூன் 5) முதல் வியாழக்கிழமை (ஜூன் 7) வரை வழங்கப்படும். மாவட்ட முதன்மைக் கல்வி அலுவலர் அலுவலகங்கள், மாவட்டக் கல்வி அலுவலர் அலுவலகங்கள், அரசுத் தேர்வுகள் மண்டல துணை இயக்குநர் அலுவலகங்கள் (சென்னை நீங்கலாக) இந்த விண்ணப்பங்களைப் பெற்றுக் கொள்ளலாம்.

சமச்சீர் பாடத்திட்டத்தின் கீழ் மொழி மற்றும் ஆங்கிலப் பாடங்களுக்கு மறுகூட்டலுக்கான கட்டணம் ரூ.305 ஆகும். பிற பாடங்களுக்கான மறுகூட்டல் கட்டணம் ரூ.205 ஆகும். இந்தக் கட்டணத்தை தமிழ்நாடு மற்றும் புதுச்சேரியைச் சேர்ந்தவர்கள் கருவூல செலுத்துச்சீட்டின் மூலம் செலுத்தி அதற்கான ரசீதை இணைக்க வேண்டும்.

கடந்த ஆண்டு மே 27ம் தேதி தேர்வு முடிவுகள் வெளியிடப்பட்டன. பத்தாம் வகுப்புத் தேர்வுகள் இந்த ஆண்டு சற்று தாமதமாகத் தொடங்கியதால், முடிவுகளும் தாமதமாக வெளியாகின்றன.