காதல் ஜோடி விஷம் குடித்து தற்கொலை

துவரங்குறிச்சி: திருச்சி மாவட்டம் துவரங்குறிச்சி அடுத்த செவல்பட்டி கண்ணப்பன் மகன் இளங்கோவன்(23). ஹோட்டல் மேனேஜ்மெண்ட் படிப்பு முடித்துவிட்டு, மதுரையில் வேலை செய்து வந்தார். வளையபட்டி சேதுராமன் மகள் தயமந்தி(19). இவர் வீட்டிலிருந்த படியே பி.எஸ்சி., படித்து வந்தார்.
ஒரே வகுப்பை சேர்ந்த இளங்கோவன், தயமந்தி இருவரும் நீண்ட காலமாக காதலித்தனர். இவர்களுடைய காதலுக்கு இருதரப்பு பெற்றோரும் பலத்த எதிர்ப்பு தெரிவித்துள்ளனர். இதனால், மனமுடைந்த இளங்கோவன், தயமந்தி ஆகிய இருவரும் துவரங்குறிச்சி அரசு பஸ்டெப்போ அருகிலுள்ள மோரனிமலைக்கு நேற்று முன்தினம் இரவு 11 மணியளவில் சென்று பூச்சி கொல்லி மருந்தை சாப்பிட்டுள்ளனர். பூச்சி மருந்தை சாப்பிட்டவுடன், தயமந்தி மொபைல் ஃபோன் மூலம் தனது உறவினர்களுக்கு தகவல் கூறியுள்ளார்.

மோரனிமலை பகுதியில் வந்து தேடி பார்ப்பதற்குள் தயமந்தி இறந்து விட்டார். உயிருக்கு போராடிக்கொண்டிருந்த இளங்கோவனை உடனடியாக திருச்சி அரசு மருத்துவமனையில் சேர்த்தனர். இறந்துபோன தயமந்தியை அவருடைய உறவினர்கள் நேற்று காலையில் வளையபட்டிக்கு எடுத்துச்சென்று எரித்து விட்டனர். திருச்சி அரசு மருத்துவமனையில் சிகிச்சை பெற்று வந்த இளங்கோவனும் நேற்று இறந்து விட்டார். இளங்கோவனின் சடலம் பிரேத பரிசோதனைக்காக திருச்சி அரசு மருத்துவமனையில் வைக்கப்பட்டுள்ளது. துவரங்குறிச்சி போலீஸார் விசாரிக்கின்றனர்.

தினமலர்