வெளிநாட்டு சக்திகளின் தலையீடுகளுக்கு இடமளிப்பதில்லை என்பதில் அரசு உறுதி

வெளிநாட்டு சக்திகளின் தலையீடுகளுக்கு இடமளிப்பதில்லை என்பதில் அரசு உறுதி
* எதற்கும் முகம் கொடுக்க தயாராக உள்ளோம்
* பொதுநலவாய உச்சிமாநாடு திட்டமிட்டபடி இலங்கையில் நடைபெறும்
எம். எஸ். பாஹிம்
உள்நாட்டு விவகாரங்களில் வெளிநாட்டு சக்திகள் தலையீடு செய்வதற்கு இடமளிப்பதில்லை என்ற கொள்கையில் அரசாங்கம் தொடர்ந்தும் உறுதியாக இருப்பதாக அமைச்சரவை ஊடகப் பேச்சாளரும் தகவல் ஊடகத்துறை அமைச்சருமான கெஹலிய ரம்புக்வெல்ல தெரிவித்தார். முன்னுரிமை அடிப்படையில் அரசாங்கம், நல்லிணக்க ஆணைக்குழுவின் சிபார்சுகளை முன்னெடுத்து வருவதாகக் குறிப்பிட்ட அவர் சர்வதேச மட்டத்தில் எழும் பிரச்சினைகளுக்கு முகம்கொடுக்க தயாராக உள்ளதாக கூறினார்.

அமைச்சரவை முடிவுகளை அறிவிக்கும் ஊடகவியலாளர் மாநாட்டில் ஐ. நா. மனித உரிமைப் பேரவை இலங்கை தொடர்பில் முன்வைத்துள்ள யோசனைகள் குறித்து கேள்வி எழுப்பப் பட்டது. இதற்குப் பதிலளித்த அமைச்சர்,

எமது நாட்டின் ஆட்புல ஒருமை ப்பாட்டிற்கும் இறைமைக்கும் பாதிப்பில்லாத குறிப்பான விடயங்கள் தொடர்பில் சர்வதேச தரப்பினருடன் நாம் பேசத் தயாராக உள்ளோம். மிதிவெடி அகற்றுதல் போன்ற விடயங்களுக்கு எமது அனுமதியுடன் சர்வதேச அமைப்புகள் ஈடுபட்டுள்ளன.

நல்லிணக்க ஆணைக்குழுவின் அறிக்கையிலுள்ள சிபார்சுகள் முன்னுரிமை அடிப்படையில் அமுல்படுத்தப்பட்டு வருகிறது. நீண்ட காலத் திட்டங்களை முன்னெடுப்பதற்கான அடித்தளம் இடப்பட்டுள்ளது. நாட்டின் ஜனநாயக த்தையும் இறைமையையும் பாதுகாக்கும் வகையில் எமது நடவடிக்கைகள் இடம்பெறுகிறது.

சர்வதேச குழுக்கள் முன்வைக்கும் விடயங்கள் எமது இறைமைக்குப் பாதிப்பில்லாத நியாயமான கோரிக்கைகள் என்றால் அது தொடர்பில் கவனம் செலுத்த முடியும் அதனையும் தாண்டிச் செல்லும் விடயங்கள் குற்றச்சாட்டுகள் குறித்து பேசவும் அதற்கு முகம் கொடுக்கவும் நாம் தயார். அமெரிக்க உயர்மட்ட குழு நாட்டின் பொதுவான விடயங்கள் தொடர்பில் ஆராயவே வந்தது. அதனால் அவர்களுக்கு அனுமதி வழங்கப்பட்டது. ஆனால் நாட்டின் இறைமை மற்றும் பாராளுமன்ற நடவடிக்கையுடன் தொடர்புள்ள விடயங்கள் தொடர்பில் ஆராய வருவதாக இருந்ததாலே வர்மாவுக்கு இங்கு வர அனுமதி மறுக்கப்பட்டது. நவம்பர் மாதத்தில் இலங்கையில் பொது நலவாய உச்சிமாநாடு நடைபெறுவது உறுதி. கனடாவும் சில டயஸ் போரா அமைப்புகளும் இதற்கு எதிராக செயற்பட்டன. ஆனால் திட்டமிட்டபடி மாநாடு இங்கு நடைபெறும் என்றார்.