கடத்தி பலாத்காரம் செய்யப்பட்ட சிறுமி குடும்பத்துக்கு இலவச வீடு

by **நண்பன்** Sun 10 Mar 2013 - 6:37

திருவனந்தபுரம்: கேரளாவில் சாலையோரத்தில் தாயுடன் தூங்கிக்கொண்டிருந்த போது கடத்தி பலாத்காரம் செய்யப்பட்ட சிறுமியின் குடும்பத்துக்கு இலவச வீடு கட்டி கொடுக்கப்படும் என முதல்வர் உம்மன்சாண்டி தெரிவித்தார். கேரள மாநிலம் மலப்புரம் மாவட்டம் திரூரில் சாலையோர கடை வாசலில் தாயுடன் படுத்திருந்த 3 வயது சிறுமியை ஒரு கும்பல் கடத்தி சென்று கொடூரமான முறையில் பலாத்காரம் செய்தது. அந்த சிறுமி ஆபத்தான நிலையில் சிகிச்சை பெற்று வருகிறாள். இது தொடர்பாக தனிப்படை போலீசார் 14 பேரை பிடித்து விசாரணை நடத்தி முக்கிய குற்றவாளியான பரப்பனங்காட்டை சேர்ந்த முகமது ஜாசிம் (23) என்பவரை கைது செய்தனர். இந்நிலையில் கேரள முதல்வர் உம்மன்சாண்டி மருத்துவமனையில் சிகிச்சை பெற்றுவரும் அந்த சிறுமியை நேற்று சந்திக்க சென்றார். ஆனால், சிறுமி தீவிர சிகிச்சை பிரிவில் அனுமதிக்கப்பட்டிருந்ததால் முதல்வரால் பார்க்க முடியவில்லை. இதையடுத்து உம்மன்சாண்டி, சிறுமியின் தாயை சந்தித்து பேசினார். அப்போது அவர், சிறுமிக்கான மருத்துவ செலவுகளை அரசு ஏற்பதுடன், இலவசமாக வீடு கட்டி கொடுக்க நடவடிக்கை எடுக்கப்படும். குழந்தைகளின் கல்வி செலவையும் அரசே ஏற்கும் என உறுதியளித்தார்.

தினகரன்.