இலங்கை - பங்களாதேஷ் டெஸ்ட் வெற்றி தோல்வியின்றி முடிவு

காலியில் நடைபெற்ற இலங்கை மற்றும் பங்களாதேஷ் அணிகளுக்கு இடையிலான முதலாவது டெஸ்ட் போட்டி வெற்றி தோல்வியின்றி நிறைவுபெற்றது.

நேற்றைய 5ம் நாள் ஆட்டத்தை ஆரம்பித்த இலங்கை அணி சிறப்பான ஆட்டத்தை வெளிப்படுத்தியது. இலங்கை அணி சார்பாக டில்சான், சங்கக்கார ஜோடி இரண்டாவது விக்கட்டுக்காக 213 ஓட்டங்களை பகிர்ந்து கொண்டனர்.

டெஸ்ட் போட்டியில் 16 சதத்தைப் பூர்த்தி செய்த டில்சான் 126 ஓட்டங்களுடன் ஆட்டமிழந்தார். குமார் சங்கக்கார 105 பெற்றுக் கொடுத்ததுடன் பங்களாதேஷ் அணிக்கு எதிராக இரு இன்னிங்ஸிலும் சதம் பெற்றமை விசேட அம்சமாகும். அத்துடன் குமார் சங்கக்கார டெஸ்ட் அரங்கில் இலங்கை அணி சார்பாக அதிக சதங்கள் பெற்றோர் வரிசையில் முதலவாது இடத்தை பெற்றுக் கொண்டார். மொத்தமாக இவர் 32 டெஸ்ட் சதங்களை பெற்றுள்ளதுடன் இவருக்கு அடுத்த படியாக மஹேல ஜயவர்தன 31 சதங்களை பெற்று இரண்டாம் இடத்தில் உள்ளார்.

இலங்கை அணி இரண்டாவது இன்னிங்ஸில் 4 விக்கட்டுகளை இழந்து 335 ஓட்டங்களைப் பெற்றிருந்த போது ஆட்டத்தை இடைநிறுத்திக் கொண்டது. தனது கன்னி டெஸ்ட் போட்டியில் விளையாடிய கித்ருவன் விதானகே 59 ஓட்டங்களைப் பெற்றுக் கொடுத்தார். அது மாத்திரமின்றி மெத்தியுஸ் 38 ஓட்டங்களையும், திரிமான்ன 2 ஓட்டங்களுடன் ஆட்டமிழக்காமல் இருந்தனர்.

267 எனும் வெற்றி இலக்கை நோக்கி துடுப்பெடுத்தாடிய பங்களாதேஷ் அணி நேற்றைய ஐந்தாம் நாள் ஆட்ட நேர முடிவில் ஒரு விக்கட்டை மாத்திரம் இழந்து 70 ஓட்டங்களை பெற்றிருந்த போது ஆட்டம் முடிவுக்கு கொண்டு வந்ததை அடுத்து ஆட்டம் வெற்றி தோல்வி இன்றி நிறைவு பெற்றது. பங்களாதேஷ் அணியின் ஆரம்பத்துடுப்பாட்ட வீரர் ஜஹ்ருல் இஸ்லாம் 41 ஓட்டத்தையும், மொஹமட் அஷ்ரபுல் 22 ஓட்டத்துடன் ஆட்டமிழக்காமல் இருந்தனர்.

காலி டெஸ்ட் போட்டி பல்வேறு சாதனைகள் இடம்பெற்ற போட்டியாக நிறைவுபெற்றது. இலங்கை அணியின் குமார் சங்கக்கார இரு இன்னிங்ஸிலும் சதம் பெற்றதுடன் கன்னி டெஸ்ட் போட்டியில் விளையாடிய கித்ருவன் விதானகே அரைச்சதம் பெற்றமையும் குறிப்பிடத்தக்கது.

அது மாத்திரமின்றி இலங்கை அணியின் லஹிரு திரிமான்ன மற்றும் தினேஷ் சந்திமால் டெஸ்ட் அரங்கில் கன்னிசதத்தை பூர்த்தி செய்துள்ளனர். லஹிரு திரிமான்ன முதலாவது இன்னிங்ஸில் 155 ஓட்டங்களைப் பெற்றதுடன் தினேஷ் சந்திமால் 116 ஓட்டங்களையும் பெற்றுக் கொடுத்தனர். இலங்கை அணி முதல் இன்னிங்ஸில் 570 ஓட்டங்களையும் இரண்டாவது இன்னிங்ஸில் 335 ஓட்டங்களையும் பெற்றது. பங்களாதேஷ் அணி முதல் இன்னிங்ஸில் 638 ஓட்டங்களும், இரண்டாவது இன்னிங்ஸில் 70 ஓட்டங்களையும் பெற்றது.

பங்களாதேஷ் அணி டெஸ்ட் அரங்கில் இலங்கைக்கு எதிரான டெஸ்ட் போட்டியொன்றை முதல் தடவையாக சமனிலைப்படுத்தியமை விசேட அம்சமாகும். அத்துடன் பங்களாதேஷ் அணி டெஸ்ட் போட்டியில் முதல் தடவையாக 600 ஓட்ட இலக்கை அடைந்ததும் இப்போட்டியிலாகும்.

பங்களாதேஷ் அணியின் தலைவர் முஷ்பிகுர் ரஹீம் டெஸ்ட் போட்டியில் முதல் தடவையாக இரட்டை சதம் அடித்து சாதனை புரிந்துள்ளார். அத்துடன் பங்களாதேஷ் அணி சார்பாக முதல் தடவையாக இரட்டை சதம் அடித்தவர் என்பதும் குறிப்பிடத்தக்கது. பங்க ளாதேஷ் அணியின் தலைவர் முஷ்பிகுர் ரஹீம் மற்றும் மொஹமட் அஷ்ரபுல் ஜோடி 5வது விக்கட்டுக்காக 267 ஓட்டங்களைப் பெற்றமை இலங்கை அணிக்கு எதிராக பெறப்பட்ட அதிகூடிய இணைப் பாட்டமாகவும் பதிவு செய்யப்பட்டுள்ளது. இப்போட்டியில் இரு அணி வீரர்களும் மொத்தமாக 8 சதங்களைப் பெற்றுள்ளமை குறிப்பிடத்தக்க அம்சமாகும். இப்போட்டியில் கன்னி இரட்டைச் சதம் அடித்த பங்களாதேஷ் அணியின் தலைவர் முஷ்பிகுர் ரஹீம் ஆட்ட நாயகனாக தெரிவு செய்யப் பட்டார்.

இலங்கை மற்றும் பங்களாதேஷ் அணிகளுக்கு இடையிலான இரண்டவாது டெஸ்ட் போட்டி எதிர்வரும் 16ம் திகதி கொழும்பு ஆர்.பிரேமதாஸ மைதானத்தில் நடைபெறவுள்ளது.