மௌனத்தின் ஒலிக்குறிப்பு

by **veel** Wed 13 Mar 2013 - 17:42

மௌனத்தின் ஒலிக்குறிப்பு

கடந்துவிட முடிந்தாலும்
தொடர்கின்றன
ஒருபகல் நிலவைப்போல
இறந்துபோன நேசிப்புகளும் காயங்களும்,

சப்தங்களை பிரிந்த
சங்குகளாய் வெதும்புகின்றன
இன்றைய பொழுதுகளில் - இந்த
இதயத்தின் துடிப்புக்கள்..

விழிகரைந்துருகி
விடை கொடுத்தும்,
கரைந்துமழிந்திடாத
நதிக்கரை படுக்கைகளாய்
உள்நிறைந்து போகிறது நேசிப்புக்கள்.

நல்ல நிலக்காலங்களிலும்,
சில அதிகாலைகளிலும்,
தேவதைகள் இறங்கிஅலங்கரிக்கின்றனர்
நேசிப்பு மீதான கனவுகளை,

நேசிப்பின் கொடிமரங்களில்
அலங்கரிக்கப்பட்ட கனவுகள்

அறைந்துகொள்கின்றன தங்களை,
நிதர்சனங்களின்
வலிகளை சுமந்து மௌனமாக,

இந்த
மௌனங்கள் திரண்டொரு பெரும்
ஒலிக்குறிப்பாய் எழும்!
அது ஒரு,
நேசிப்புக்கான மரணத்தை
உங்கள் முகங்களில் அறையும்.

நன்றி..
நேற்கொழு தாசன்