புகைக்காதவர்களுக்கும் `புகை’ ஆபத்து!

by **ஹனி** Thu 3 Feb 2011 - 16:38

நீங்கள் புகை பிடிக்கும் பழக்கம் இல்லாதவர்தானே? `ஆமாம்’ என்று பெருமையாகத் தலையாட்டாதீர்கள். உங்களுக்கும் `புகை’யால் ஏற்படும் பாதிப்பு அபாயம் இருக்
கிறது. அதாவது, புகையை வெளியிடுவோருக்கு அருகில் இருப்பவர்களுக்கும் பாதிப்புகள் ஏற்படுகின்றனவாம். அதிலும் அவர்களுக்கு கேட்புத்திறனும் பாதிக்கப்படும் என்று `குண்டு போடுகிறார்கள்’ ஆய்வாளர்கள்.

புகைப் பழக்கம் உள்ளவர்களுக்கு கேட்புத் திறன் பாதிக்கப்படலாம் என்பது ஏற்கனவே நிரூபிக்கப்பட்ட உண்மை. அதேகதிதான், புகைப்பழக்கம் இல்லாமல், புகை பிடிப்பவர்களின் அருகில் இருப்பவர்களுக்கும் என்கிறார்கள் விஞ்ஞானிகள். அமெரிக்காவில் 3 ஆயிரம் பேரை வைத்து மேற்கொள்ளபட்ட ஆய்வில் இது உறுதிசெய்யப்பட்டிருக்கிறது.

காதுக்குள் உள்ள ண்ணிய ரத்த நாளங்களில் ரத்த ஓட்டத்தை புகைப் பழக்கம் பாதிக்கிறது, அதன் விளைவாக ஆக்சிஜன் பற்றாக்குறை ஏற்பட்டு, நச்சுக் கழிவுகள் சேர்கின்றன. அதன்விளைவாக, இறுதியில் காதின் உட்பகுதியில் சேதம் ஏற்படுகிறது. இவ்வாறு ஏற்படும் பாதிப்பானது, அதிக சப்தம், வயதாவது ஆகியவற்றால் ஏற்படும் காது கேளாமையில் இருந்து வித்தியாசமானது. இது தொடர்பான ஒரு புதிய ஆய்வை மியாமி பல்கலைக்கழகம் மற்றும் புளோரிடா சர்வதேச பல்கலைக்கழக ஆய்வாளர்கள் மேற்கொண்டனர். அவர்கள், புகைக்காத 3 ஆயிரத்து 307 பேரை ஆய்வுக்கு உட்படுத்தினர். அவர்களில் சிலர் முன்பு புகைப் பழக்கம் இருந்தவர்கள், சிலர் என்றுமே புகைப்பழக்கம் இல்லாதவர்கள்.

குறைந்த, மத்திய, அதிக அலைவரிசைகளில் அவர்களுக்கு எவ்வாறு கேட்புத்திறன் இருக்கிறது என்று ஆய்வு செய்யப்பட்டது.

புகைக்காமலே அடுத்தவர் வெளியிடும் புகையைச் சுவாசிப்பதால் தாக்கம் இருக்கிறதா என்று அறிவதற்காக, நிக்கோட்டினின் உபபொருளான `கோட்டினைன்’, அவர்களின் ரத்தத்தில் உள்ளதா என்று பரிசோதிக்கப்பட்டது. புகையிலை புகை உள்ளுக்குள் செல்லும்போது `கோட்டினைன்’ ரத்தத்தில் கலக்கும்.

இந்த ஆய்வில், புகைக்காமலே அடுத்தவரின் புகையைச் சுவாசிப்பவர்களுக்கு, புகையுடன் தொடர்பே இல்லாதவர்களை விட காது கேளாமை அபாயம் இருப்பது உறுதி செய்யப்பட்டது. ஒரு பின்னணி இசை ஒலிக்கும்போது, உரையாடலில் அடுத்தவர் கூறுவதைக் கவனிக்க முடியாமல் அவர்கள் தவிக்கவும் செய்கின்றனர்.

ஆய்வுக்குத் தலைமை வகித்தவரான டாக்டர் டேவிட் பேப்ரி கூறும்போது, “ஒருவருக்குப் பாதிப்பு ஏற்பட அவர் அடுத்தவரின் புகையை எநதளவு சுவாசிக்க வேண்டும் என்று எங்களால் துல்லியமாகக் கண்டுபிடிக்க முடியவில்லை. ஆனால் புகை வாசம் படாமல் இருப்பதே நல்லது” என்கிறார்.