மூடப்பட்ட அணு உலையை மீண்டும் திறப்பதாக வடகொரியா அறிவிப்பு

மூடப்பட்ட அணு உலையை மீண்டும் திறப்பதாக வடகொரியா அறிவிப்பு
அமெரிக்க யுத்த கப்பல் தென் கொரியாவில்
வட கொரியா தனது யொன்பியொன் வளாகத்திலுள்ள அனைத்து அணுசெயற்பாடுகளையும் மீளவும் ஆரம்பிக்கவுள்ளதாக அறிவித்துள்ளது. இந்த அறிவிப்பு தென்கொரியா மற்றும் அமெரிக்காவுடனான போர் பதற்றத்தை மேலும் அதிகரித்துள்ளது.

கடந்த 2007 ஆம் ஆண்டு மூடப்பட்ட யூரேனியம் செறிவூட்டும் வசதி மற்றும் அணு உலை உட்பட அனைத்து செயற்பாடுகளும் மீண்டும் ஆரம்பிக்கப்படும் என வடகொரிய அணு சக்தி நிறுவனத்தை மேற்கோள் காட்டி அந்நாட்டு அரச ஊடகம் செய்தி வெளியிட்டுள்ளது.

மின்சார பற்றாக்குறை மற்றும் இராணுவ அபிவிருத்தி ஆகியவற்றை கருத்தில் கொண்டே அணு செயற்பாடுகள் மீண்டும் ஆரம்பிக்கப்படுவதாக குறிப்பிடப்பட்டுள்ளது. அணு ஆயுதப் படையின் தரம் மற்றும் அளவை உயர்த்தும் வகையிலும் மின்சார பற்றாக்குறைக்கு தீர்வுகாணும் வகையிலும் இந்த முடிவு எடுக்கப்பட்டதாக வட கொரிய அணு சக்தி நிறுவனத்தின் பேச்சாளர் கூறியுள்ளார்.

வட கொரியாவின் அறிவிப்புக்கு தென் கொரியா நேற்று உடன் பதில் கொடுத்துள்ளது. இந்த அறிவிப்பு உண்மையாயின் அதனை மன்னிக்க முடியாது என தென்கொரிய வெளியுறவு அமைச்சின் பேச்சாளர் சோடெ யங் குறிப்பிட்டுள்ளார். “வட கொரியா, கொரிய தீபகற்பத்தில் அணு செயற்பாடுகளை தடுக்க செய்துகொண்ட வாக்குறுதி மற்றும் ஒப்பந்தங்களை பேணி நடந்துகொள்ள வேண்டும். தற்போதைய நிலை குறித்து எமது அரசு தீவிரமாக அவதானித்து வருகிறது” என யங் குறிப்பிட்டார்.

சீனாவும் வடகொரியாவின் அறிவிப்புக்கு தமது கவலையை வெளியிட்டுள்ளது. அனைத்து தரப்பும் அமைதிகாக்கும்படி சீன வெளியுறவு அமைச்சின் பேச்சாளர் வலியுறுத்தியுள்ளார்.

யொன்பியொன் அணு வளாகம் சர்வதேச அணு ஒப்பந்தத்தின் கீழ் கடந்த 2007 ஆம் ஆண்டு மூடப்பட்டதாகும். இங்கிருந்தே அணு ஆயுத செயற்பாடுகளுக்கு தேவையான புளூடோனியம் பெறப்படுவதாக நம்பப்படுகிறது. எனினும் நான்கு முதல் எட்டு அணு குண்டுகள் தயாரிக்கும் அளவுக்கு வட கொரியாவிடம் புளூடோனியம் கையிருப்பில் இருப்பதாக நம்பப்படுகிறது.

இதன்படி அணு வளாகம் திறக்கப்பட்டால் வட கொரியாவால் புளூடோனியம் செறிவூட்டல் மூலம் அணு ஆயுதம் தயாரிக்க வாய்ப்பு ஏற்படும் என அவதானிகள் குறிப்பிட்டுள்ளனர்.

மறுபுறத்தில் ஏவுகணை தாக்குதலில் இருந்து பாதுகாக்கும் வகையில் அமெரிக்காவின் யுத்த கப்பல் தென் கொரியாவின் தென் மேற்கு கடற்கரையில் கடந்த திங்கட்கிழமை நிறுத்தி வைக்கப்பட்டுள்ளது. 154 அடி நீளம் கொண்ட அமெரிக்க கடற்படையின் ஏவுகணை அழிக்கும் யுத்த கப்பலே தென்கொரியாவில் நிலைநிறுத்தப் பட்டுள்ளது.

வடகொரிய பாராளுமன்றம் கடந்த திங்கட்கிழமை முழு தினம் கூடி தற்போதைய பதற்றம் குறித்து விவாதித்தது. இதன்போது வடகொரியாவை அணு ஆயுத தேசமாகவும் பாராளுமன்றம் தீர்மானம் நிறைவேற்றியது. வடகொரியா மூன்றாவது அணு ஆயுத சோதனை மேற்கொண்டதைத் தொடர்ந்து ஐ. நா. அதன் மீது பொருளாதார தடைகளை விதித்தது மற்றும் அமெரிக்கா- தென் கொரியாவின் கூட்டு இராணுவ பயிற்சி தொடர்பில் வட கொரியா ஆத்திரமடைந்துள்ளது. இந்த பின்னணியிலேயே வடகொரியா நாளாந்தம் எச்சரிக்கைகளை விடுப்பதோடு கொரிய தீபகற்பத்தில் போர் பதற்றத்தை அதிகரிக்கும் வகையில் செயற்பட்டு வருகிறது.