சிக்கன நடவடிக்கையின் காரணமாக அமெரிக்க ஜெட் போர் விமானங்கள் தரையிறக்கம்

வாஷிங்டன், ஏப். 10-

பாரக் ஒபாமா, இரண்டாவது முறையாக அமெரிக்க அதிபராகப் பதவி ஏற்றவுடன், மார்ச் மாதம் முதல், பொருளாதார சிக்கன நடவடிக்கைகள் மேற்கொள்ளப்பட்டன. செவ்வாய்க் கிழமை அன்று, அமெரிக்க அரசு, தனது மூன்றாவது ஜெட் போர் விமானப் படையைத் தரை இறக்கியது, செலவினங்களைக் குறைப்பதன் முக்கிய நடவடிக்கையாகக் கருதப்படுகின்றது.

மற்ற அமெரிக்க படைத்தளங்கள், ஐரோப்பா, பசிபிக் பெருங்கடல் விமானத்தளங்களிலும், விமானங்கள் படிப்படியாகத் தரையிறக்கப்படலாம் என விமானப் போர்ப்படைத்தலைவர் ஜெனரல் மைக் ஹோஸ்டேஜ் அறிக்கை வெளியிட்டுள்ளார். தாக்குதல் தவிர, மற்ற பிரிவுகளில் இயங்கும் ஜெட் விமானங்களும் இந்த நிதியாண்டு முடிவதற்குள், அதாவது செப்டம்பர் மாதத்திற்குள், இவ்வகையான அறிவிப்பினை எதிர்பார்க்கலாம் எனக் கருதப்படுகின்றது.

45,000 மணி நேரத்திற்கும் குறைவான அளவே பறக்கும் ஒத்திகைப் பயிற்சியில் ஈடுபடுவது என்பதுவும் இந்த சிக்கன நடவடிக்கையின் ஒரு பகுதியாக இருக்கக்கூடும். ஆப்கானிஸ்தானில் பணியில் ஈடுபட்டுள்ள முக்கிய படைகள் தவிர, மற்றவை சுழல் முறையில் இயக்கப்பட்டால், சிக்கன நடவடிக்கையில் நாம் எதிர்பார்க்கும் பலன் கிடைக்கும் என்ற கருத்தையும் ஹோஸ்டேஜ் தெரிவித்துள்ளார்.

மாலைமலர்