கூடங்குளம் அணுஉலை இயங்கலாம் ; உச்ச நீதிமன்றம் அதிரடி தீர்ப்பு

by **நண்பன்** Tue 7 May 2013 - 10:11

கூடங்குளம் அணுஉலை இயங்கலாம் ; உச்ச நீதிமன்றம் அதிரடி தீர்ப்பு
தமிழ்நாட்டில் கூடங்குளத்தில் ரஷ்ய நாட்டு உதவியுடன் தலா ஆயிரம் மெகாவாட் மின்சாரம் உற்பத்தி செய்யும் ஆற்றல் கொண்ட இரண்டு அணு உலைகளுடன் கூடிய மின்நிலையம் அமைக்கப்பட்டுள்ளது. இந்த அணு மின் நிலையத்தை மத்திய அரசு, தமிழக அரசு, இந்திய அணுமின் கழகம் ஆகியவை இணை ந்து இயக்குகின்றன.

இந்த அணுமின் நிலையத்தின் முதல் அணு உலை, மின் உற்பத்தியை தொடங்க தயார் நிலையில் உள்ளது. இதற்கிடையே 'இந்த அணு மின் நிலையத்தால் சுற்றுச் சூழல் பாதிக்கும், அந்தப் பகுதி மக்களின் வாழ்வாதாரம் கேள்விக்குறியாகும்' என பல்வேறு காரணங்களை கூறி உள்ளூர் மக்கள் பல்வேறு போராட்டங்களை நடத்தி வந்தனர்.

உச்ச நீதிமன்றில் அணு மின் திட்ட எதிர்ப்பாளர்கள் பல்வேறு வழக்குகளையும் தொடுத்துள்ளனர். இந்த வழக்குகளில், வல்லுனர் குழு பரிந்துரை செய்த பாதுகாப்பு அம்சங்கள் அமுல்படுத்தப்படவில்லை என குற்றம் சாட்டி இருப்பதுடன், அணுக் கழிவுகளை வெளியேற்றுவதற்கான வழிமுறைகள், சுற்றுச் சூழலில் ஏற்படுத்தும் தாக்கம், அந்த வட்டார மக்களின் பாதுகாப்புக்கான உத்தரவாதம் மற்றும் பல்வேறு அம்சங்கள் குறித்து கேள்விகள் எழுப்பப்பட்டுள்ளன.

இந்த வழக்குகள் முதல் முறையாக கடந்த ஆண்டு செப்டெம்பர் 13 ஆம் திகதி விசாரணைக்கு வந்தபோது அணு உலையில் எரிபொருள் நிரப்ப தடை விதிக்க மறுக்கப்பட்டது. அதே நேரம் 'சுற்றுவட்டாரப் பகுதி மக்களின் பாதுகாப்புதான் முக்கியம், அதற்கு இடையூறாக இருக்கிற அம்சங்கள் குறித்து ஆராயப்படும்' என கோர்ட் கூறியது.

தொடர்ந்து இந்த வழக்குகளை உச்ச நீதிமன்ற நீதிபதிகள் கே. எஸ். ராதாகிருஷ்ணன், தீபக் மிஸ்ரா ஆகியோரை கொண்ட பெஞ்சு விசாரித்து வந்தது. விசாரணையின் போது கூடங்குளம் அணு மின் நிலையம் முழுமையான பாதுகாப்பு அம்சங்களை கொண்டிருக்கிறது. இயற்கை பேரிடர்களை தாங்கி நிற்கும் வலுவை கொண்டுள்ளது. தீவிரவாத தாக்குதல்களையும் எதிர்கொள்ளுகின்ற ஆற்றல் வாய்ந்தது என அரசு தரப்பில் விளக்கம் அளிக்கப்பட்டது.

3 மாத காலம் தொடர் வாதங்களை கேட்டு பதிவு செய்த நீதிபதிகள் தீர்ப்பை ஒத்தி வைத்தனர். அந்த தீர்ப்பு இன்று (திங்கட்கிழமை) வழங்கப்பட்டது. நீதிபதிகள் ராதாகிருஷ்ணன், தீபக் மிஸ்ரா அடங்கிய சுப்ரீம் கோர்ட் பெஞ்ச் இன்று அளித்த தீர்ப்பில் கூறியிருப்பதாவது :

பாதுகாப்பு குறித்து ஆய்வு செய்வதற்காக அமைக்கப்பட்ட அனைத்து குழுக்களும் கூடங்குளம் அணுமின் நிலையம் பாதுகாப்பாக உள்ளது என்ற ஒரே கருத்தை தெரிவித்துள்ளன.

நாட்டின் வளர்ச்சிக்கும் பொதுமக்கள் தேவைக்கும் அணுமின் நிலையங்கள் தேவைப்படுகின்றன.

இந்தியாவின் அணு சக்தி கொள்கையை நாங்கள் மதிக்கிறோம். பயன்படுத்தப்பட்ட எரிபொருளை சேமிக்கும் முறையை மத்திய அரசு ஏற்க வேண்டும்.

அணுமின் நிலையம் பாதுகாப்பாக உள்ளது என குழுக்கள் அளித்த அறிக்கையின் அடிப்படையில் கூடங்குளம் அணுமின் நிலையம் செயல்பட அனுமதி அளிக்கிறோம்.

இவ்வாறு நீதிபதிகள் தீர்ப்பளித்தனர்.

கூடங்குளம் அணுமின் நிலையம் செயல்பட தடை விதிக்க வேண்டும் என்ற பூவுலக நண்பர்களின் கருத்தை ஏற்கவும் நீதிபதிகள் மறுத்தனர்.

தினகரன்.