அஞ்சி வாழ்வது வாழ்க்கையா?

அஞ்சி வாழ்வது வாழ்க்கையா?
நகரத்துச் சுண்டெலி ஒன்று தன் நண்பனாகிய இன்னொரு சுண்டெலியைக் காண விரும்பி, வெகு தொலைவில் இருந்த வயலுக்குச் சென்றது.

வயல் சுண்டெலி தன் நண்பனாகிய நகரத்து எலியை அன்புடன் வரவேற்று, நெல், கோதுமை போன்ற தானிய வகைகளை நண்பனுக்கு உண்ணக் கொடுத்தது.

சிறிது நேரம் அவற்றைக் கொறித்த நகரத்துச் சுண்டெலி, “நண்பா! ஏன் இப்படி இளைத்திருக்கிறாய்? இந்த எளிய உணவைத் தான் உண்கிறாயா? என்னுடன் நகரத்திற்கு வா. எவ்வளவு சுவையான உணவு வகைகள் எங்களுக்குக் கிடைக்கின்றன தெரியுமா? எப்படி வளமாக வாழ்கிறோம் என்பதைப் பார்” என்று அன்புடன் அழைத்தது.

அதன் அழைப்பை ஏற்றுக் கொண்ட வயல் சுண்டெலியும் நகரத்துச் சுண்டெலியும் புறப்பட்டது. இரண்டும் ஒரு பெரிய வீட்டை அடைந்தன.

“இது தான் என் வீடு. இங்குள்ள பொந்திற்குள் நாம் இருவரும் பதுங்கி இருப்போம். விருந்து முடிந்ததும் சாப்பாட்டு அறைக்கு உன்னை அழைத்துச் செல்கிறேன். உன் விருப்பம் போல உணவு உண்ணலாம்” என்றது நகரத்துச் சுண்டெலி.

இரண்டு சுண்டெலிகளும் பொந்திற்குள் மறைந்திருந்தன. விருந்து முடிந்து எல்லோரும் சாப்பிட்டு விட்டுச் சென்றார்கள்.

“நண்பா! நாம் விருந்துண்ண இது தான் நல்ல நேரம் வா” என்று அழைத்தது நகரத்துச் சுண்டெலி.

அங்கிருந்த உணவு வகைகளைப் பார்த்து வியப்பு அடைந்தது வயல் சுண்டெலி. “நண்பா! நீ சொன்னது உண்மை தான். நகரத்து வாழ்க்கையே மேலான வாழ்க்கை. இவ்வளவு உணவு வகைகளை என் வாழ்நாளிலேயே பார்த்தது இல்லை. நானும் உன்னைப் போல நகரத்திலேயே வாழப் போகிறேன்” என்று மகிழ்ச்சியுடன் சொன்னது.

அப்பொழுது யாரோ ஒருவர் சாப்பாட்டு அறைக் கதவைத் திறந்து கொண்டு உள்ளே நுழைந்தார்.

“வீட்டுக்காரர் வந்து விட்டார். அவர் கண்ணில் நாம் பட்டால் நம்மைக் கொன்று விடுவார். ஓடித் தப்பித்துக் கொள்” என்று அலறியபடிச் சொன்னது நகரத்துச் சுண்டெலி. எலிகளைப் பார்த்த அவரும் துரத்தினார்.

அவரிடம் தப்பித்த இரண்டு எலிகளும் எப்படியோ பொந்திற்குள் வந்து சேர்ந்தன.

“நான் இனி இங்கே இருக்க மாட்டேன். என் வயலுக்குப் புறப்படுகிறேன்” என்றது வயல் சுண்டெலி.

“ஏன் அதற்குள் புறப்படுகிறாய்?” என்று கேட்டது நகரத்துச் சுண்டெலி.

“அங்கே வயலில் எனக்குக் கிடைப்பது எளிய உணவாக இருக்கலாம். நான் எந்த அச்சமும் இன்றி அதை உண்கிறேன். நான் இன்று உன்னால் அடைந்த அச்சத்தை என் வாழ்நாளிலேயே அடைந்தது இல்லை. என்ன இனிப்பான உணவுகள் கிடைத்தாலும் அஞ்சி அஞ்சி வாழ்வது ஒரு வாழ்க்கையா?” என்று சொல்லிவிட்டுப் புறப்பட்டது வயல் சுண்டெலி.

*_ *_ *_ *_ 

*_  *_