வால்பாறையில் தென்மேற்கு பருவமழை தீவிரம்: அணைகளுக்கு நீர்வரத்து அதிகரிப்பு

by *சம்ஸ் Tue 4 Jun 2013 - 7:17

வால்பாறை,ஜுன்.3-
வால்பாறை பகுதியில் தென் மேற்கு பருவமழை கடந்த மே மாதம் 30-ந் தேதி முதல் தொடங்கி பெய்து வருகிறது. வால்பாறை பகுதியில் மட்டுமல்லாமல் வால்பாறை பகுதியை ஒட்டியுள்ள கேரள மாநிலப் பகுதிகளிலும் பருவ மழை பெய்து வருகிறது.

தற்போது பெய்து வரும் மழை காரணமாக வால்பாறை சுற்றுவட்டார பகுதியிலிருக்கும் ஆறுகளில் தண்ணீர் வரத்து ஏற்பட்டுள்ளது. கடந்த 24 மணிநேரத்தில் வால்பாறையில் 38 மி.மீ. மழையும், சோலையார் அணையில் 63 மி.மீ. மழையும், சின்னக் கல்லாரில் 60 மி.மீ. மழையும், நீராரில் 42 மி.மீ. மழையும் பெய்துள்ளது.

சோலையார் அணைக்கு விநாடிக்கு 421.41 கன அடி தண்ணீர் வந்து கொண்டிருக்கிறது. அணையின் நீர்மட்டம் 22.50 அடியாக உயர்ந்துள்ளது. தொடர்ந்து மழைபெய்து வருவதால் மின் உற்பத்திக்கும் வாய்ப்பு ஏற்பட்டுள்ளது. மேலும் பருவ மழை பெய்யத் தொடங்கியுள்ளதால் தேயிலைத் தோட்ட நிர்வாகத்தினர் புதிய தேயிலைச் செடிகளை நட்டு வைக்கும் பணியை தொடங்கியுள்ளனர்.